ސީރިޔާގެ ރަސްމީ ނޫސް އޭޖެންސީ އާއި ވާހަކަ ދައްކަމުން އެގައުމުގެ ހާރިޖީ ވަޒީރު ފައިސަލް މިގްދާދް ވިދާޅުވީ،، ރައީސް ބައްޝާރުލް އަސަދުގެ ސަރުކާރުން ޑޮނެސްކް ޕީޕަލްސް ރިޕަބްލިކް އަދި ލުހަންސްކް ޕީޕަލްސް ރިޕަބްލިކް އަކީ މިނިވަން ދައުލަތެއްގެ ގޮތުގައި ބަލައި ގަންނަ ކަމަށާއި، އަދި ރަޝިއާއިން ނިންމު ނިންމުމަށް ފުރިހަމައަށް ތާއީދު ކުރާ ކަމަށެވެ.
މިއީ ރަޝިއާއިން ޑޮނެސްކް ޕީޕަލްސް ރިޕަބްލިކް އަދި ލުހަންސްކް ޕީޕަލްސް ރިޕަބްލިކް އަކީ ވަކި ދައުލަތެއްގެ ގޮތުގައި ބަލައިގަތުމަށް ނިންމު ނިންމުމަށް ތާއީދު ކުރި ފުރަތަމަ ގައުމެވެ. އަދި މިއީ ރަޝިއާއަށް ލިބިގެންދާނެ ބާރެއް ކަމަށްވެސް މަސްރަހު ދިރާސާ ކުރާ ފަރާތްތަކުން ވަނީ ބުނެފައެވެ.
ރަޝިއާއިން މި ދައުލަތަކީ މިނިވަން ދައުލަތެއް ކަމަށް ނިންމުމާއި އެކު އީޔޫ އިން ވަނީ އެގައުމާއި މެދު ދަތިކުރުމުގެ ފިޔަވަޅު އަޅާނެ ކަމަށް ބުނެފައެވެ.
އެކަމާއި ގުޅިގެން ރަޝިއާއިން ބުނީ، އެއްވެސް ބަޔަކު އަޅާފާނެ ދަތިކުރުމުގެ ފިޔަވަޅަކާއި ހެދި ފަސްޖެހުމެއް ނެތް ކަމަށާއި، ނިންމުން ބަދަލު ކުރުމުގެ ވިސްނުމެއް ވެސް ނުގެންގުޅޭ ކަމަށެވެ. އަދި މި ދެ ދައުލަތުގެ ދިފާއުގައި ކުރަންޖެހޭ ކަންކަން ކުރާނެ ކަމަށްވެސް ރަޝިއާ ސަރުކާރުން ވަނީ ބުނެފައެވެ.
ރަޝީއާ ސަރުކާރުން ވަނީ، ޑޮނެސްކް ޕީޕަލްސް ރިޕަބްލިކް އަދި ލުހަންސްކް ޕީޕަލްސް ރިޕަބްލިކްގެ އަމާން ބެލެހެއްޓުމަށް ސިފައިން ފޮނުވުމަށް ތައްޔާރީތައް ވާން ފަށާފައެވެ. އެގޮތުން މިހާރުވެސް ޔޫކްރެއިން އާއި ރަޝިއާގެ ބޯޑަރު ކައިރީ ގިނަ އަދަދެއްގެ ރަޝިއާގެ ސިފައިން އަންނަނީ ހަރަކާތްތެރި ވަމުންނެވެ.