މިކަން އިއުލާންކުރައްވާފައިވަނީ މިރޭ އިމްތިޔާޒް ފަހުމީގެ ކެންޕެއިން ޓީމުން ކުޅުދުއްފުށީ ސިޓީގައި ބޭއްވި ޖަލްސާގައި ރައީސް ނަޝީދުގެ ކޮއްކޯފުޅު، އީވާ އަބްދުﷲއެވެ.
އެމްޑީޕީގެ ޗެއަޕާސަން އިންތިހާބަކީ ރައީސް ނަޝީދާއި ގުޅުމެއްް ނެތް އިންތިހާބެއް ކަމަށް ގަބޫލުކުރުމަކީ "ވަހުމެއް"ކަން ފާހަގަކުރައްވާ ވާހަކަދައްކަވަމުން މަޖިލީހުގެ ނައިބު ރައީސްކަންވެސް މިވަގުތު ފުރުއްވަމުން ގެންދަވާ އީވާ ވިދާޅުވީ، 2023ވަނަ އަހަރުވެސް ބޭނުންވަނީ އެމްޑީޕީގެ ވެރިކަމެއް ރާއްޖޭގައި ބާއްވަން ކަމަށާއި، އެ އިންތިހާބުގައި ރަައީސް ނަޝީދު ކުރިމަތިލައްވާނެ ކަމަށެވެ.
އީވާ ވިދާޅުވީ ކުރިއަށް އޮތް ޗެއަ ޕާސަން އިންތިހާބާއި އެމްޑީޕީގެ މުސްތަގުބޮލާއި ވަރަށް ބޮޑަށް ގުޅިފައިވާ ކަމަށެވެ. މި ފުރުސަތަކީ އެމްޑީޕީ ސަލާމަތްކުރަން ލިބޭނެ އެންމެ ފަހު ފުރުސަތު ކަމުގައި ވުމަކީ ވެސް އެކަށީގެންވާ ކަމެއް ކަމަށް ވިދާޅުވިއެވެ.
މި އިންތިހާބާއި ރައީސް ނަޝީދާއި އެއްވެސް ގުޅުމެއް ނެތްކަމަށް ބަޔަކު ދައްކަން އުޅުނަސް އެކަން އަމިއްލަ ނަފްސަަށް ވެސް އޮޅުވާނުލުމަށް އީވާ ތަކުރާރުކޮށް އެދިވަޑައިގަތެވެ. އީވާ އިތުރަށް ވިދާޅުވީ، މި އިންތިހާބާއި ކުރިމަތިލީންސުރެ ކަނޑައެޅިގެން ރައީސް ނަޝީދާއި ދިމާލަށް އަންނަތަން ފެނިވަޑައިގަންނަވާ ކަމަށެވެ.
އެކަމަކީ ރައީސް ނަޝީދު ޕާޓީން ބޭރުކުރުމަށް ރާވައިގެން އިންތިޒާމުކޮށްގެން ކުރާ ކަމެއްކަން އަމިއްލަ ނަފްސަށް އެއްވެސް މީހަކު އޮޅުވާނުލުމަށް އީވާ ގޮވާލެއްވިއެވެ.
ރައީސް ނަޝީދު އަންނަ ރިޔާސީ އިންތިހާބުގެ އެމްޑީޕީ ޕްރައިމަރީގައި ވާދަކުރައްވާނެކަމަށް އީވާ ވިދާޅުވިނަމަވެސް އެކަން އަދި ރައީސް ނަޝީދު ރަސްމީކޮށް ހާމައެއް ނުކުރައްވައެވެ. ނަމަވެސް އެމަގުން ހިޔާލުފުޅު ގެންގުޅުއްވާކަން ދޭހަވާ އެތައް ވާހަކަތަކެއް ރައީސް ނަޝީދު އަންނަނީ ދައްކަވަމުންނެވެ.
އެގޮތުން މިފަހުން ހޫނުވެފައިވާ އެމްޑީޕީގެ ގައުމީ މަޖިލީހުގެ ވަޓްސް އެޕް ގުރޫޕުގައި ޖައްސަވާ މެސެޖުތަކުންވެސް އިތުރަށް މި ސަރުކާރުގައި އޮންނަން ބޭނުން ނުވާކަމާއި، ރައީސް ސޯލިހު އަންނަ އިންތިހާބެއްގައި ވެރިކަމުގައި ބަހައްޓަވަން ބޭނުންނުވާ ބީދައަކުން ދަނީ ވާހަކަދައްކަވަމުންނެވެ.
ރައީސް ނަޝީދު މިފަހުން ވަނީ އެމްޑީޕީ ސަރުކާރާއި ފެޔަށް ޖެހުމަށްވެސް ގޮވާލައްވާފައެވެ.
