ސީއެންއެމްއަށް މައުލޫމާތުދެއްވަމުން އިމިގްރޭޝަން ގެ މީޑިޔާ އޮފިޝަލް މިފްތާހް "ސީއެންއެމް" އަށް މިއަދު ވިދާޅުވީ ރާއްޖެއިން ބޭރަށް ފުރާއިރާއި، އެނބުރި ރާއްޖެ އައުމުގެ ކުރިން އިމުގާ ޕޯޓަލް މެދުވެރިކޮށް "ޓްރެވެލާ ޑިކްލަރޭޝަން" ފޯމު ފުރަންޖެހޭ ކަމަށާއި، ޕޯޓަލް މެދުވެރިކޮށް މި ފޯމު ފުރިހަމަ ކުރަންޖެހޭއިރު ބައެއް ކަހަލަ ދަތިތައް ކުރިމަތިވެގެން އިމިގްރޭޝަނަށް ހުށައެޅިފައިވާ ކަމަށެވެ.
އިމުގާ ޕޯޓަލް އަކީ އިމިގްރޭޝަނުން ކުރަންޖެހޭ މަސައްކަތްތައް ފަސޭހަ ކަމާއިއެކު ކުރުމަށް ހަދާފައިވާ ޕޯޓަލް އެކެވެ. އިމުގާ ޕޯޓަލް މެދުވެރިކޮށް ދަތުރުވެރިޔާގެ ސިއްހީ އެކި މައުލޫމާތުތައް ހުށަހަޅަންޖެހެއެވެ.
އޭގެ ތެރޭގައި ވެކްސިން ފުރިހަމަކޮށްފައިވާނަމަ އެކަމުގެ ތަފްސީލު ހާމަކުރަންޖެހެއެވެ. އެކަމުގެ ލިޔެކިޔުންތަކުގެ ކޮޕީއެއް ހެލްތު ޑިކްލަރޭޝަން ފޯމާއެކު އިމުގާ ޕޯޓަލްއަށް ހުށަހަޅަންޖެހެއެވެ.
