ހުޅުމާލޭ ރެސްޓޯރެންޓެއް ތެރޭ ވަޅިން ހަމަލާދީ ބަންގްލަދޭޝް މީހެއް މަރާލިތާ އަދި މަހެއްހާ ދުވަސް ނުވެއެވެ. އެމީހާ މަރާލުމަށް ފަހު ޕާކިސްތާނު މީހާ ފިލީއެވެ. ޕޮލިހުންނަށް ޖެހުނީ "ވޯންޓެޑް" ޖަހާށެވެ. ބަންގްލަދޭޝް ޝާހީން އަށް ވަޅިން ހަމަލާދީ މަރާލި ކަމުގެ ތުހުމަތުގައި އެ ރެސްޓޯރަންޓުގައި މަސައްކަތް ކުރަމުންދިޔަ ޕާކިސްތާނު ކައްކާ މުހައްމަދު އާބިދު ފުލުހުން ވަނީ ހައްޔަރު ކޮށްފައެވެ.
ބަންގްލަދޭޝް ޝާހީންގެ އާއިލާއަށް ލިބުނީ ހިތްދަތި ކަމެވެ. ޝާހީންގެ އާއިލާއާއި ހަވާލާދީ ބަންގްލަދޭޝްގެ ނޫސްތަކުގައި ކޮށްފައިވާ ރިޕޯޓެއްގައި ބުނެފައިވަނީ، ޝާހީން އަކީ އާއިލާއަށް ހުރިހާ ކަމެއް ކޮށްދެމުން އައި މީހާ ކަމަށާއި، ޝާހީން މަރާލުމުން މުޅި އާއިލާއަށް އޭގެ އަސަރު ކޮށްފައިވާ ކަމަށެވެ. އަދި ޝާހީން މަރާލި މީހާއަށް އޭގެ ހައްގު އަދަބު ލިބެން ޖެހޭ ކަމަށާއި، އިންސާފު ލިބޭނެ ކަމަށް އުއްމީދު ކުރާ ކަމަށް ވަނީ ބުނެފައެވެ.
މާލޭގައި މާރާމާރީ ހިންގި ސަރަހައްދެއްގައި ފުލުހުން
މިއީ ރަމަޟާން މަސް ނިމުމުގެ ކުރިން ހިންގާފައިވާ މާރާމާރީއެކެވެ. އޭގެ ފަހުންވެސް ފުލުފުލުގައި އަންނަނީ މާރާމާރީ ތައް ހިންގަމުންނެވެ. ހާއްސަކޮށް ވެރިރަށް މާލޭގައެވެ.
ގިނަ ވައުދުތަކެއް ފުއްދުމުގައި ރައީސް އިބްރާހިމް މުހައްމަދު ސޯލިހުގެ ސަރުކާރު ފެއިލްވެފައިވާކަން ފާހަގަކޮށް ހިއުމަން ރައިޓްސް ވޮޗުން ރާއްޖެއަށް ވަނީ ފާޑުކިޔައިފަ އެވެ. އެ ޖަމިއްޔާއިން ނެރުނު "އައި ކުޑް ހޭވް ބީން ނެކްސްޓް": ސްޓައިމީޑް ރިފޯމްސް އިން ދަ މޯލްޑިވްސް،" ގައި ބުނެފައިވާގޮތުން، ރައީސް ސޯލިހުގެ ޒައާމަތުގެ ދަށުން ނޫސްވެރިކަމުގެ މިނިވަންކަން ހޯދައިދެވިފައިވީނަމަވެސް، ގެންނަންޖެހޭ މުހިންމު އެހެން ބަދަލުތައް ގެނައުމުގައި ވަނީ ފަރުވާކުޑަ ކޮށްލާފަ އެވެ. ހާއްސަކޮށް ގޮތްނޭނގޭ މަރުތަކުގެ ވާހަކަ އޭގައި ގެނެސްފައި ވެއެވެ.
ބަންގްލަދޭޝް މީހާގެ މަރަށްފަހުވެސް ގިނަ ކަންތައްތަކެއް ކުރިމަތިވިއެވެ. ހަމަލަ ދިންމީހާ ފިލީއެވެ. ޕޮލިހުން އޭނާ ހޯދުމުގެ މަސައްކަތް ފެށިއެވެ. ބަންގްލަދޭޝް މީހުންގެ ބޮޑު އާބާދީއެއް އޮންނަ މާލޭގައި އެމީހުންގެ މުޒާހަރާ ފެށީއެވެ. ބަންގްލަދޭޝް މީހާގެ އާއިލާއިން އޭނާ ގައުމަށް ފޮނުވަން އެދުނީއެވެ. އެންމެފަހުން ފުލުހުން ޕާކިސްތާނު ކައްކާ ހައްޔަރު ކުރިއެވެ.
ކުރިން ހިންގި މާރާމާރީއެއްގައި މީހަކު ހައްޔަރުކޮށްގެން ގެންދަނީ
މިކަންކަން މިހާރުވެސް މިހެން ހިނގަމުން އަންނައިރު މީގެ ޒަމާންގަނޑެއްކުރިން ހިނގާފައިވާ މަރުގެ މައްސަލަތައް މިހާރުވެސް ރާއްޖޭގެ ކޯޓު ތަކުގައި ހިނގަމުން އެބައާދެއެވެ. ޔާމީން ރަޝީދުގެ ހަށިގަނޑުގެ 34 ތަނަކަށް ވަޅިން ހަމަލާދީ މާރާލި މައްސަލާގައި ކުށް ސާބިތުވެ، އުމުރު ދުވަހުގެ ޖަލު ހުކުމެއް އިއްވި ދެމީހުންގެ ފަރާތުން އެ ހުކުމް ހައިކޯޓުގައި އިސްތިއުނާފް ކުރީ ވޭތުވެދިޔަ އެޕްރީލް މަހުގެ ފަހުކޮޅުއެވެ. އޭގެ އިތުރުން ތ. ދިޔަމިގިލީ މިސްކިތުގެ މުދިމަށް ވަޅިން ހަމަލާދީ ޒަހަމް ކޮށްލި މައްސަލައިގެ ތަހުގީގުތައް ނިންމާ ދައުވާކޮށްދިނުމަށް އެދި ފުލުހުން ޕްރޮސެކިއުޓާ ޖެނެރަލް (ޕީޖީ)ގެ އޮފީހަށް ފޮނުވީވެސް މި ދިޔަމަހު ފަހުކޮޅުއެވެ.
މިމަހު ކުރީކޮޅު މާލޭގައި ވަނީ ނުރައްކާތެރި މާރާމާރީއެއް ހިންގާފައެވެ. ޖަނަވަރީ މަގާއި މަޖީދީމަގު ގުޅޭ ހިސާބުގައި ހިނގި މި މާރާމާރީގައި ތޫނު އެއްޗަކުން ހަމަލާދީ ދެމީހަކު ވަނީ ވަރަށް ބޮޑަށް ޒަހަމް ކޮށްލާފައެވެ. އެ މާރާމާރީގެ ވީޑިއޯ ސޯޝަލް މީޑިއާގައި ދައުރުވަމުން ދިޔައެވެ. ވީޑިއޯތަކުން ފެންގޮތުން ސައިކަލު ތަކެއްގައި ދުއްވާފައި ދިޔަ ބަޔަކު ވަނީ މަގުމަތިން ހިނގާފައި ދިޔަ ދެ މީހަކަށް ބޮޑު ވަޅިއަކުން ހަމަލާދީފައެވެ. އަދި އެކަކު ފަހާ ދުވާ ދާތަންވެސް ވީޑިއޯއިން ފެނެއެވެ. ހަމައެދުވަހު މާލޭގެ މާވެޔޮ މިސްކިތް ކައިރީ އެފަދަ މާރާމާރީއެއް ހިންގައި ދެމީހަކުވަނީ ޒަހަމް ކޮށްލާފައެވެ.
މީގެ އިތުރުން މިމަހުގެ ހަތަރުވަނަ ދުވަހު ހުޅުމާލޭގައިވެސް ވަނީ މާރާމާރީއެއް ހިންގައި ދެމީހަކު ޒަހަމް ކޮށްލާފައެވެ. ޖެހިގެންއައި ފަސްވަނަ ދުވަހުވެސް ހަމަ ހުޅުމާލޭގައި ވަނީ ދެމާރާމާރީއެއް ހިންގައި ބަޔަކަށް އަނިޔާ ކޮށްފައެވެ. އަދި މިމާރާމާރީ ހިންގިމީހުންގެ ތެރެއިން އެކަކު ފިލީއެވެ. ފުލުހުންނަށް ޖެހުނީ އެމީހާ ހޯދުމަށްވެސް ހާއްސަ އޮޕަރޭޝަނެއް ހިންގާށެވެ. މި މާރާމާރީ ތަކާ ގުޅިގެން ފުލުހުންވަނީ ބަޔަކު ހައްޔަރުވެސް ކޮށްފައެވެ.
މީގެ އިތުރުން މިމަހުގެ ހަތްވަނަދުވަހު ވަނީ ކޯރާޑިއަކުން ފުލުހަކަށް އަނިޔާދީ ޒަހަމް ކޮށްލާފައެވެ.
ސާއިލް އަށް އަނިޔާ ކުރާ ވީޑިއޯގެ ސްކްރީން ޝޮޓެއް
މިމަހު އެންމެފަހުން ފާހަގަ ކުރެވުނީ ކުޑަކުއްޖަކަށް އަނިޔާދޭ މަންޒަރު ދައްކައިދޭ ވީޑިއޯއެކެވެ. ށ. މިލަންދޫ ސްކޫލްގައި ތައުލީމް ހާސިލް ކުރަމުންދާ އިބްރާހީމް ސާއިލްއަށް އަނިޔާކުރަމުންދާ މަންޒަރެވެ. ކުރިން ހިނގި މާރާމާރީތަކުގައިވެސް ކުޑަކުދިން ބައިވެރި ވެފައިވެއެވެ. މި މާރާމާރީގައި މުޅިންވެސް ކުޑަކުދީންނެވެ. ބައެއް މީހުން ބުނި ގޮތުގައި އުޅެނީ ތަރުބިއްޔަތުގެ މައްސަލައެވެ. ގޭތެރެއިން ތަރުބިއްޔަތު ނުކުރެވެނީއެވެ. އެކަމުގައި އެހެން ބަޔަކު ކުށްވެރި ކުރުމުގެ ބޭނުމެއް ނެތެވެ.
