ދަރަބޫދޫ ނަރުދަމާގެ މަސައްކަތް ކުރަން އައިސްފަތިބި ބިދޭސީ މަސައްކަތްތެރިންތަކެއް އެ ރަށު މިސްކިތުގައި ނިދާ މައްސަލައެއް ފެންމަތިވެ، އަމާޒުވަމުންދާ ފާޑުކިއުންތަކާއި ގުޅިގެން ކައުންސިލުން ނެރުނު ބަޔާނެއްގައި ބުނީ، މިސްކިތެއްގެ ގޮތުގައި ކުރިން ބޭނުންކުރަމުން އައި "ދާރުލްއުލޫމް" އަކީ އެތަނުގައި ގަބުރު ހުންނާނެކަމަށް ލަފާކުރެވިގެން 2017ވަނަ އަހަރު ބޭނުންކުރުން ހުއްޓާލުމަށްފަހު މިސްކިތުގެ ދަފްތަރުން އުނިކޮށް އިސްލާމިކް މިނިސްޓްރީން އެ ކައުންސިލާއި "ހަވާލުކޮށްފަވާ އިމާރާތެއް" ކަމަށެވެ.

އެ މިސްކިތް މީގެ ކުރިން ވަނީ، 2020ވަނަ އަހަރު އެރަށުގެ ބަނދަރު ހެދުމުގެ މަސައްކަތް ކުރި އެމްޓީސީސީ މަސައްކަތްތެރިންނަށްވެސް 10،000 ރުފިޔާއަށް ކުށްޔަށް ދޫކޮށްފަ އެވެ. މީހުން އެ މިސްކިތުގައި ދިރިއުޅޭ މިމައްސަލަ ފެންމަތިވީއިރު، އެތަނުގައި ތިބީ ފެނާއި ނަރުދަމާގެ މަސައްކަތްކުރާ އިންޑިއާގެ އެސްއެމްސީ އިންފްރަސްޓްރަކްޗާ ކުންފުނީގެ މުވައްޒަފުން ނެވެ.

މި މައްސަލަ ފެންމަތިވެ، އަމާޒުވި ފާޑުކިއުންތަކާއި ގުޅިގެން އިސްލާމިކް މިނިސްޓްރީންވެސް ރޭ ވަނީ ބަޔާނެއް ނެރެފަ އެވެ. 

މިނިސްޓްރީން ބުނީ، އެމިސްކިތް ކައުންސިލާއި ހަވާލުކުރީ އެތަން ބޭނުން ނުކޮށް ހުންނާތީ، ގުރުއާން ކްލާހެެއް ހިންގުމަށް އެތަން ދިނުމަށް ކައުންސިލުން އެދުމުން ކަމަށާއި، އޭގެފަހުން އެތަނުގައި ގުރުއާން ކްލާހެއް ހިންގިކަން މިމިނިސްޓްރީއަށް އެގުނު ކަމަށެވެ.

ސޯޝަލް މީޑިއާގައި އާއްމުވެފައިވާ ވީޑިއޯ އަކުން ފެންނަގޮތުން އާސާރީ މިސްކިތެއްގެ ބޭރުގައި ރޯނުދަމައިގެން އެމީހުންގެ އެއްޗެހިވެސް ހިއްކަން އަޅާފައިވާއިރު، މިސްކިތު އެތެރޭގައި އެއްބަޔަކު ތުވާލި އަދެގެން އަނެއްބަޔަކު ތަންމަތި އަޅައިގެން އޮށޯވެގެން ތިއްބެވެ.