މަޖިލިސް އިދާރާ ދޮށުގައި ބުރާސްފަތި ދުވަހު ނޫސްވެރިން މުޒާހަރާކޮށް ކަންބޮޑުވުންތައް ހާމަ ކުރަން ފެށުމާއި އެކު މަޖިލީހުގެ ރައީސް މުހައްމަދު ނަޝީދު ބޭރަށް ނުކުމެވަޑައިގެން ނޫސްވެރިންނާ ބައްދަލު ކުރެއްވި އެވެ. އެހެން ނަމަވެސް ނޫސްވެރިންގެ ކަންބޮޑުވުންތަކަށް ހައްލެއް ހޯއްދަވައިދެއްވުމުގެ ބަދަލުގައި ކުރިން ނޫސްވެރިކަމަށް އެންމެ ބޮޑަށް ވަކާލާތު ކުރެއްވި ރައީސް ނަޝީދު ވެސް މި ފަހަރު ނެންގެވީ އޭނގެ އަނެއް ކޮޅެވެ. ވިދާޅުވީ މިވަގުތަށް ހޯދައި ދެވޭނެ ހައްލެއް ނެތް ކަމަށެވެ.
ގިނަ ނޫސްވެރިން ގަބޫލު ކުރާ ގޮތުގައި މިއީ ރައީސް ނަޝީދު ނެންނެގި ވަރަށް ޒިންމާދާރުކަން ކުޑަ ސްޓޭންޑެކެވެ. އެ ބިލު ފާސްނުކޮށް އަލުން ވިސްނާލުން އެއީ އޮތް ފުރުސަތެކެވެ. މަޖިލީހުގެ މެޖޯރިޓީގެ ބޭނުންކޮށްގެން މީގެ ކުރިން ވެސް އެ ނޫން ވެސް އެކަހަލަ ކިތައްމެ ކަމެއް ކޮށްފައި އެބަހުއްޓެވެ. އުސޫލުތަކުގެ ބޭރުންނާއި އެތެރެއިން ވެސް ކަންކަން ކުރުމަކީ މަޖިލީހުން ކޮށްފައިވާ ކަމެކެވެ. ކުރެވޭނެ ވެސް ކަމެކެވެ. އެކަން މަޖިލީހުން ނުކުރުމުން ދެން އެކަން ކުރެއްވޭނީ ރައީސުލް ޖުމްހޫރިއްޔާއަށެވެ.
ނޫސްވެރިންގެ ކަންބޮޑުވުންތަކަށް ހައްލެއް ހޯއްދަވައި ނުދެއްވައި ބިލް ފާސް ކުރެއްވުމުން ދެން އެކަމުގައި ހައްލެއް ހޯދައިދެވޭނީ ރައީސް އިބްރާހީމް މުހައްމަދު ސާލިހަށެވެ. ބިލު ފާސްކޮށްފައި މަޖިލީހުން ރައީސުލްޖުމްހޫރިއްޔާއަށް ފޮނުވުމުން، ބިލް ތަސްދީގުކޮށް ގާނޫނަކަށް ބަދަލު ކުރުމުގެ ކުރިން އަލުން ވިސްނުމަށް މަޖިލީހަށް ފޮނުވުމަކީ ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރެކެވެ. ގާނޫނު އަސާސީގެ 91 ވަނަ މާއްދާއަކީ ރައީސުލް ޖުމްހޫރިއްޔާއަށް ނޫސްވެރިންގެ ކަންބޮޑުވުންތަކާ ގުޅޭ ހައްލު ހޯއްދަވައިދެއްވޭނެ މާއްދާއެވެ.
ހުރިހާ ނޫސްވެރިންގެ އުއްމީދަކީ ވެސް މިހާރު މަޖިލީހުން ފާސްކޮށްފައިވާ މި ބިލް، ރައީސް އެ އޮތް ގޮތަށް ތަސްދީގު ނުކުރައްވައި ދެ ވަނަ ވިސްނުމަކަށް އަލުން މަޖިލީހަށް ފޮނުއްވައިދެއްވުންކަމާ މެދު ޝައްކެއް ވެސް ނެތެވެ. ނޫސްވެރިކަމުގެ މިނިވަން ކަމުގެ ދުވަހު ރައީސް ފޮނުއްވި ހިތާބުގައިވެސް ނޫސްވެރިކަމާ މެދު ރައީސްގެ ސްޓޭންޑް ސާފުކޮށް ވިދާޅުވެފައިވާތީއެވެ. އެ ދުވަހު އެ މަނިކުފާނު ދެއްވި ޔަގީން ކަމަކީ ނޫސްވެރިކަމުގެ މިނިވަންކަމުގެ ހައްގު ހިމާޔަތްކޮށްދިނުމަށް ސަރުކާރުން ވެފައިވާ ވައުދާ އެއްގޮތަށް، ހަބަރާއި މައުލޫމާތު ފެތުރުމުގެ ފުރިހަމަ މިނިވަންކަމާއި، މައުލޫމާތު ހޯދައި ލިބިގަތުމުގެ ހައްގު ކުރިމަގުގައި ވެސް ދިވެހި ނޫސްވެރިންނަށާއި ދިވެހި ރައްޔިތުންނަށް ފުރިހަމައަށް ލިބިދިނުމެވެ.