ސާފްގެ އޯޑިނަރީ ކޮންގްރެސް ބާއްވައި، އިތުރު ދައުރަކަށް މިހާރުވެސް ރައީސްކަމުގައި ހުންނެވި ބަންގްލަދޭޝްގެ ޙާޒީ އެމްޑީ ސަލާހުއްދީންވަނީ މި ހަފްތާގައި އިންތިހާބުކޮށްފައެވެ. ޑާކާގައި އޮތް ސާފްގެ ކޮންގްރެސްއަށް ފަހު މީޑިއާތަކާ ވާހަކަ ދައްކަވަމުން ސާފްގެ ޖެނެރަލް ސެކެއްޓްރީވަނީ، ސާފް ޗެމްޕިއަންޝިޕްގެ ފޯމެޓް ބަދަލު ކުރުމުގެ ވިސްނުން ހާމަ ކުރައްވާފައެވެ.
އަންވަރުލް ހައްގު ވިދާޅުވި ގޮތުގައި މިހާތަނަށް ސާފް ޗެމްޕިއަންޝިޕް ބާއްވަމުން އައި ސެންޓްރަލައިޒްޑް ވެނިއު ނުވަތަ އެއް ތަނެއްގައި ބޭއްވުމުގެ ބަދަލުގައި ހޯމް އެންޑް އަވޭ އުސޫލުން ގައުމުތަކުގެ މެދުގައި ކުޅުމަށް މާކެޓިން ޕްރޮޕޯސަލެއް ސާފަށްވަނީ ލިބިފައެވެ.
ދެ އަހަރުން އެއް އަހަރު ބާއްވާ ސާފް ޗެމްޕިއަންޝިޕް އާއްމުކޮށް ބާއްވަނީ އެއް ގައުމުގައެވެ. ދެހާސް އަށްވަނަ އަހަރު ރާއްޖެއާ ލަންކާ ގުޅިގެން ދެ ގައުމުގައި މުބާރާތް ބޭއްވިއެވެ. އެންމެ ފަހުން ސާފް ޗެމްޕިއަންޝިޕް ބޭއްވީ ރާއްޖޭގައެވެ. އެއީ މިދިޔަ އަހަރުއެވެ.
ސާފް ޗެމްޕިއަންޝިޕްގެ ފޯމެޓް ބަދަލު ކުރުމުގެ އިތުރުން ސާފް ކްލަބު ޗެމްޕިއަންޝިޕްގެ މަޝްވަރާތައްވެސް އަނެއްކާވެސްވަނީ ފެށިފައެވެ. ސާފް ކްލަބު ޗެމްޕިއަންޝިޕްގެ މަޝްވަރާތައް ގިނަ ދުވަސްތަކަކަށް ދެމިގެން ގޮސްފައިވާއިރު، އެކަމުގައި އަދި އަލިމަގެއް ނުފެނެއެވެ.