މައުލޫމާތު ލިބިފައިވާ ގޮތުގައި ފިނޭންސް މިނިސްޓްރީގެ ޒިންމާދާރު ވެރިޔާގެ މަގާމުގައު ހުރި، އަބްދުﷲ އަލީ އަށް ވިނަރެސް ފުލެޓު ލިބިފައިވާ ކަމަށް ބުނެ އެޗްޑީސީގެ ނަމުގައި އޮޅުވާލައިގެން ކުރި ފޯނު ކޯލަކާއި ގުޅިގެން އޭނާ ވަނީ 80،000 އަށް ވުރެ ގިނަ ރުފިޔާ ގުޅި ފަރާތުން ބުނި އެކައުންޓަކަށް ޖަމާ ކޮށްދީފަ އެވެ. އޭނާ މި ފައިސާ ޖަމާކޮށްފައި ވަނީ، އޭނާގެ ބެލުމުގެ ދަށުގައި އޮންނަ ފިނޭންސް މިނިސްޓްރީގެ ކްރެޑިޓް ކާޑުންނެވެ. 

މިކަމާއި ގުޅިގެން ނަން ނުޖެހުމަށް ޝަރުތުކޮށް، "ސީއެންއެމް" އަށް މައުލޫމާތު ދިން ފިނޭންސް މިނިސްޓްރީގެ އިސް އޮފިޝަލަކު ބުނީ، އަބްދުﷲ އަލީ އަށް ވިނަރެސް އިން ފުލެޓު ލިބިފައިވާ ކަމަށް ބުނެ އޮޅުވާލައިގެން އެޗްޑީސީގެ ނަމުގައި ބަޔަކު ގުޅި ކަމަށެވެ. އަދި  އެ ފުލެޓު ޔަގީން ކުރުމަށްޓަކައި ޑައުން ޕޭމަންޓުގެ ގޮތުގައި 80،000 ރުފިޔާ ދައްކަން ބުނުމުން އޭނާ އަތުގައި އޮތް މިނިސްޓްރީގެ ކްރެޑިޓް ކާޑުން އެ ފައިސާ ޓްރާންސްފާ ކުރި ކަމަށެވެ. 

މީގެ އިތުރުން އޮފިޝަލް ބުނީ، މީގެ ކުރިން ވެސް އެ މިނިސްޓްރީގެ އެކި މުވައްޒަފުން އަތުން މި ފަދައިން ފައިސާ ހޯދާފައި އެބަހުރި ކަމަށާއި، މިފަދަ ކަންކަމަށް އިތުރަށް ސަމާލުކަން ދޭން ޖެހޭ ކަމަށެވެ. 

ފުލެޓު ދޭނެ ކަމަށްބުނެ އެޗްޑީސީގެ ނަމުގައި މީގެ ކުރިންވެސް އޮޅުވާލައިގެން ބަޔަކު ފައިސާ ހޯދުމުގެ މަސައްކަތް ކުރަމުން އަންނަ އިރު، އެޗްޑީސީއާއި ފުލުހުން ވެސް ވަނީ، މިފަދަ ކޯލް ތަކުން ފައިސާ ޖަމާ ކުރަން ބުނިނަމަވެސް އެ ގޮތަށް ކަންކަން ނުކުރުމަށް އެދިފަ އެވެ.