އެފަދަ ވެރިކަމެއް ރާއްޖޭގައި ގާއިމުވާ ދުވަހަކުން، އެ ދުވަހަކުން މީހުން މެރުމާ، ޑްރަގާ، ވައްކަމާ، ފޭރުމާ، ރޭޕް ފަދަ ކުށްތައް މުޅީންހެން ހުއްޓިގެންދާނެ ކަމަށެވެ. އޭރުން އަމާން، އުފާވެރި ގައުމެއް ދިވެހީން ދެކޭނެ ކަމަށް ވިދާޅުވި އެވެ.
ދިރިހުރުމުގެ ހައްގަކީ ކޮންމެ މީހަކަށް ލިބިގެންވާ ހައްގެއް ކަމަށްވާއިރު، އެއްވެސް ހައްގަކާ ނުލައި މީހަކު މަރާލާމީހާއަށް އިސްލާމީ ޝަރީއަތުގައި އޮންނަގޮތުގެ މަތިން މަރަށް މަރު ހިފުމުގެ އަދަބު ރާއްޖޭގައި ތަންފީޒު ނުކުރާނަމަ މިފަދަ ލާއިންސާނީ އަމަލުތައް ރާއްޖޭގައި އާއްމުވެދާނެ ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުން ނެވެ.
ރާއްޖޭގައި މަރުގެ ހުކުމް އިއްވާފައި ތިބި ބޮޑެތި ކުށްވެރިން އެބަތިއްބެވެ. އެކަމަކު އެ ހުކުމް ތަންފީޒެއް ނުކުރެ އެެވެ.
މިވަގުތު ރާއްޖޭގައި މަރުގެ ހުކުމް އިއްވާ، ހުކުމް ތަންފީޒުކުރުމަށް އިސްލާމީ ޝަރީއަތުގައިވާ ގޮތުގެމަތިން ހުރިހާ އިޖުރާއަތުތަކެއް ފުރިހަމަވާ މީހުން އެބަތިއްބެވެ. އެއީ:
- ހ. ލޮބީ ހުސެއިން ހުމާމު(ޑރ. އަފްރާޝިމް އަލީގެ ގާތިލު)
- ގ. ރީފް މުހައްމަދު ނަބީލް( އަބްދުﷲ ފަރުހާދުގެ ގާތިލު)
- މ. މަސްރޫރާ، މުއްރަތު (ގާނޫނީ ވަކީލް އަހުމަދު ނަޖީބުގެ ގާތިލު)
- މީގެ 10 އަހަރު ކުރިން މާލޭގައި ތޫނު އެއްޗަކުން ހަމަލާދީ މާރާލި ސ. ހިތަދޫ ވަރުދީގޭ، ހަސަން ބަޝީރަށް ހަމަލާދިން ގ. ކޯޒީ އިބްރާހިމް ޝަހުމް އާދަމް
- ކ. ތުލުސްދޫގައި 2014 ވަނަ އަހަރު އަލީ ޝިހާމް މަރާލި މުހައްމަދު ނިޔާޒު
- އދ. ދަނގެތީގައި އަނިޔާވެރިގޮތަކަށް މަހުމޫދު އަބޫބަކުރު މަރައިލި، ޝާ އޮލަމް މިއާ(ސާލިމް)
ލީތަލް އިންޖެކްޝަން ބޭނުންކޮށްގެން ނުވަތަ ދަން ޖައްސައިގެން މަރުގެ އަދަބު ތަންފީޒުކުރުމަށް ރައީސް ޔާމީންގެ ވެރިކަމުގައި ގަވާއިދެއް އެކުލަވާލާ އެކަން ކުރުމަށް ބޭނުންވާ ކޮޓަރިވެސް ތައްޔާރުކުރިއެވެ. އަދި އެ ހުކުމް ތަންފީޒުކުރާނެ ކަމަށް އޭރު ބުންޏެވެ. އެކަމުގެ އިޖުރާއަތުތައް ކަނޑައަޅައި، އެކުލަވާލާފައިވާ ގަވާއިދުގައިވާ ގޮތުން މަރުގެ އަދަބު ތަންފީޒުކުރެވޭނީ، ހުރިހާ އިޖުރާއަތުތަކާ އެއްގޮތަށް އަދި ގާނޫނީ ގޮތުން ހުރިހާ ކަމެއް ފުރިހަމަވެފައިވާކަން އެނގޭ ލިޔުމެއް ޕްރޮސެކިއުޓާ ޖެނެރަލް، އުއްތަމަ ފަނޑިޔާރު ނުވަތަ އުއްތަމަ ފަނޑިޔާރު ކަނޑައަޅާ ފަރާތެއްގެ އިތުރުން ކޮމިޝަނާ އޮފް ޕްރިޒަންސް އެކުލެވޭ ކޮމިޓީއަކުން ސޮއިކޮށް ރައީސްއަށް ފޮނުވުމުންނެވެ.
އަދި ލިޔުން ލިބޭތާ ތިން ދުވަހުގެ ތެރޭގައި، ކުށް ސާބިތުވެފައިވާ މީހާގެ މައްޗަށް މަރުގެ އަދަބު ތަންފީޒުކުރުމުގެ އަމުރެއް ރައީސުލްޖުމްހޫރިއްޔާ ކޮމިޝަނަ އޮފް ޕްރިޒަންސްއަށް ފޮނުވަން ޖެހެ އެވެ.
މަރުގެ އަދަބު ތަންފީޒުކުރެވޭނީ، އެ ލިޔުން ކޮމިޝަނާ އޮފް ޕްރިޒަންސްއަށް ލިބޭތާ ގިނަވެގެން ހަތް ދުވަހުގެ ތެރޭގައި ކޮމިޝަނާ އޮފް ޕްރިޒަންސް، މޯލްޑިވްސް ކަރެކްޝަނަލް ސާވިސްއިން ކަނޑައަޅާ ޑޮކްޓަރަކު، ޕްރޮސެކިއުޓާ ޖެނެރަލްގެ ފަރާތުން ކަނޑައަޅާ ގާނޫނީ ވަކީލަކު އަދި ކޮމިޝަނާ އޮފް ޕްރިޒަންސް ކަނޑައަޅާ އާންމުގެ ތެރެއިން ތިން މީހެއްގެ ހާޒިރުގަ އެވެ.
ނަމަވެސް މިހާތަނަށް އެ ގަވާއިދުގައިވާ ގޮތަށް އެއްވެސް ސިފައެއްގައި އެކަން ތަންފީޒުކޮށްފައެއް ނުވެއެވެ. އަދި މި ސަރުކާރު ވެރިކަމަށް އައުމަށްފަހު، 2020ވަނަ އަހަރުގެ ނޮވެމްބަރުތެރޭ، ޔުނިވާސަލް ޕީރިއޮޑިކް ރިވިއު (ޔޫޕީއާރު) ގެ ތިންވަނަ ސައިކަލްގައި ބޭއްވި ދިވެހިރާއްޖޭގެ ރިވިއު ސެޝަންގައި އެޓާނީ ޖެނެރަލް އިބްރާހީމް ރިފްއަތު ދެއްވި އޯޕަނިން ސްޓޭޓްމަންޓްގައި ވަނީ މަރުގެ އަދަބު އުވާލަން ރާއްޖެއަށް އެކި ފަރާތްތަކުން ގޮވާލި ނަމަވެސް ގާނޫނުތަކަށް ބަދަލު ނުގެނެސް އެކަން ނުކުރެވޭނެ ކަމަށް ވިދާޅުވެފައެވެ. ނަމަވެސް އެ އަދަބު ތަންފީޒު ކުރުން ހުއްޓާލާފައި އޮތް އޮތުން ރާއްޖެއިން ދަމަހައްޓާނެ ކަމަށް ވެސް ރިއްފަތު ވިދާޅުވެފައި ވެއެވެ.
