ކްރިމިނަލް ކޯޓުގައި ހިނގަމުންދާ ރައީސް ޔާމީންގެ ޝަރީއަތްތައް ނިމޭ ގޮތަކުން، ރިޔާސީ އިންތިޚާބުގައި އެމަނިކުފާނަށް ބައިވެރިވެވޭނެތޯ ނޫންތޯ އެއީ އަދި މުޅިން އެހެން ވާހަކައެކެވެ. މި ބަލާލަނީ، ރިޔާސީ އިންތިޚާބުގައި ރައީސް ޔާމީންގެ ރަނިން މޭޓަކަށް ވެވަޑައިގަންނަވާނީ ކޮން ބޭފުޅެއްތޯއެވެ.
ރައީސް ޔާމީންގެ ވެރިކަމުގެ ފަސް އަހަރަށް ބަލައިލައިފިނަމަ ފާހަގަވާނެ އެއް ކަމަކީ އެ މަނިކުފާނަށް އިތުބާރުކޮށްގެން އެކުގައި މަސައްކަތް ކުރުމަކީ ފަސޭހަ ކަމެއް ނޫން ކަމެވެ. އެމަނިކުފާނުގެ ފުރަތަމަ ރަނިން މޭޓު އަދި ފުރަތަމަ ނާއިބު ރައީސްއަށް ޖެހިވަޑައިގަތީ އުނދަގޫ ދަތުރެކެވެ. ފިއްލަވައިގެން ރާއްޖެ ދޫކޮށް ވަޑައިގެން އެ މަނިކުފާނުގެ ވެރިކަން ނިމެންދެން އުޅުއްވީ ރާއްޖޭން ބޭރުގައެވެ. ދެވަނަ ނާއިބު ރައީސް އަހްމަދު ޢަބްދުލްޣަފޫރަށްވެސް ޖެހިވަޑައިގަތީ އުނދަގޫ ދަތުރެކެވެ. ރައީސް ޔާމީންގެ ވެރިކަން ނިމުނު އިރު އަދީބު އިންނެވީ ޖަލުގައެވެ. ތިންވަނަ ނާއިބު ރައީސް ޢަބްދުﷲ ޖިހާދާ ރައީސް ޔާމީނާވެސް ގުޅުން ރަނގަޅު ކަމަކަށް ނުފެނެއެވެ. ހަގީގަތެއް ނޭނގެއެވެ.
ޕީޕީއެމްގެ އަސާސީ ގަވައިދު ބުނާ ގޮތުން ރިޔާސީ ކެންޑީޑޭޓުގެ ރަނިން މޭޓު ކަނޑައެޅުމަކީ ޕާޓީގެ ރިޔާސީ ކެންޑިޑޭޓަށް ދޫކޮށްލާފައިވާ ކަމެކެވެ. އެހެންނަމަވެސް ރަނިން މޭޓުގެ ކިބައިގައި ހުންނަން ޖެހޭ ޝަރުތުތަކެއް ކަނޑައަޅާފައިވެއެވެ. އެއީ ޕާޓީގެ މެންބަރެއްގެ ގޮތުގައި މަދުވެގެން އަހަރެއްވުމާއި، ގާނޫނު އަސާސީގައި ބުނާ ރައީސެއްގެ ޝަރުތު ހަމަވުމެވެ. މި ޝަރުތުތަކަށް ބަލާއިރު ޑރ. ވަހީދު، ޑރ. ޖަމީލް އަދި ޑރ. ޝަހީމުގެވެސް ޝަރުތު ހަމަވެއެވެ. ޑރ. ވަހީދު ޕީޕީއެމަށް ސޮއި ކުރެއްވީ ދެހާސް ސާދަވަނަ އަހަރުއެވެ. ޑރ. ޝަހީމް ދެހާސް އަށާރަވަނަ އަހަރު ޕީޕީއެމަށް ސޮއިކުރެއްވިއިރު، ޑރ. ޖަމީލް އަލުން އެނބުރި ޕީޕީއެމަށް ވަޑައިގެންނެވީ ދެހާސް ވިހި ވަނަ އަހަރުއެވެ.
ދެން އޮތީ އެ ތިން ބޭފުޅުންގެ ތެރެއިން ރައީސް ޔާމީން ނިންމަވާ ނިންމެވުމެކެވެ. އެ ތިން ބޭފުޅުން ނޫން ބޭފުޅަކު ކަނޑަ އެޅުއްވުމަކީވެސް އެކަށީގެންވާ ކަމެކެވެ.