ނޮޅިވަރަމް ދާއިރާގެ މެމްބަރު މުހައްމަދު ނަޝީދު ހުށަހަޅުއްވާފައިވާ ޓްއަރިޒަމްގެ ގަރާރަށް ބަހުސްކުރައްވަމުން މެމްބަރު ވިދާޅުވީ، އިންވެސްޓްރުން ރާއްޖެ ނާންނަނީ އިތުބާރު ނެތުމުން ކަމަށެވެ.
މިސާލެއްގެ ގޮތުން ނެންގެވީ މަޖިލީހުގައި އޮތް ”ސެލެކްޓިވް ޖަސްޓިސް“ އެވެ. އެގޮތުން މެމްބަރު އާދަމް ޝަރީފް ވިދާޅުވީ، ސަރުކާރުގެ މަޖިލިސް މެމްބަރަކު ކުށެއް ކުރިނަމަވެސް ފިޔަވަޅެއް ނާޅާކަމަށާއި އުޅެނީ ރަށު ބަހުން ހުތުބާ ދިން މުދިމަކު ހޯދައި އޭނާއަށް ފިޔަވަޅު އަޅަން ކަމަށެވެ.
މިވާހަކަތައް މިގޮތަށް ކުރިއަށް ގެންދަން ފެށުމުން މާފަންނު މެދު ދާއިރާގެ މެމްބަރު އިބްރާހިމް ރަޝީދު(ބޮންޑޭ) ނިޒާމީ ނުކުތާއެއް ނަންގަވާ ވަނީ މެމްބަރު އާދަމް ޝަރީފް ވާހަކަދައްކަވަނީ ގަރާރަށް ނޫން ކަމަށް ވިދާޅުވެފަ އެވެ.
އަދި ރައްޔިތުންގެ މަޖިލީހުގެ މެމްބަރުން ނަގާ ބޭރަށް އުކާލުމަށްފަހު “ގުދޯ، ގުދޯ” ގޮވަނީ ކަމަށްވެސް ވިދާޅުވި އެވެ.
އާދަމް ޝަރީފުގެ ވާހަކައިގައި މީދޫ މުދިމު ހޯދަން އުޅޭކަމަށް އިޝާރާތްކުރައްވަނީ، އައްޑޫ ސިޓީ މީދޫގައި މިދިޔަ ހުކުރު ދުވަހު ހުކުރު ކުރި މުދިމު ހުތުބާ ރަށު ބަހުން ވިދާޅުވުމުން އޭނާ ސަސްޕެންޑުކޮށްފައިވާތީ އެކަމަށް އިޝާރާތްކުރައްވައެވެ.
އެގިފައިވާގޮތުގައި އޭނާ ސަސްޕެންޑުކުރިނަމަވެސް އެ މުދިމު ހުތުބާ ވިދާޅުވީ، އިސްލާމިކް މިނިސްޓްރީން ފޮނުވާފައިވާ ހުތުބާ ހަމަ އޮތްގޮތައް ހުތުބާގައިވާ އެެއްވެސް އެއްޗަކަށް ބަދަލު ނުގެނެހެވެ. ހަމައެކަނި ބަދަލުކުރި ކަމަށް ވަނީ ހުތުބާ ދިން ބަހެވެ.
