އޭނާ ހުށަހެޅި ކުއްލި މައްސަލާގައި ބުނެފައިވަނީ، މިމަހުގެ ނުވަވަނަ ދުވަހު ޑިއުޓީން ބޭރުގައި ހުއްޓައި ޑްރަގް އެންފޯސްމެންޓް ޑިޕާޓުމެންޓް(ޑީއީޑީ) ގެ ތިން ފުލުހަކަށް ހަމަލާދިނުން ވެގެން ދިޔައީ ރާވައިގެން ހިންގާ ގޭންގުތަކުން ފުލުހުންނަށް އަމާޒުކޮށް ދެމުންދާ ހަމަލާތަކަށް އިތުރުވި ބޮޅަކަށް ކަމަށެވެ.
ހަމަލާދިން މީހާ ހަމަ އެދުވަހު ހައްޔަރުކުރި ނަމަވެސް އެއީ ނުރައްކާތެރި އެހާމެ ސީރިއަސް މައްސަލައެއްގެ ގޮތުގަައި ހައްލުހޯދަން ޖެހޭ ކަމެއްކަމަަށް ގަބޫލުކުރެވޭ ކަމަށް އެ މައްސަލާގައި ވެއެވެ.
ޑީއީޑީ އޮފިސަރުންނަށް ހަމަލާދިން ދުވަހު، އޮފިސަރަކު ފުޓުބޯޅަ ކުޅެގެން ގެއަށް ދަނިކޮށް ކަމަށާއި، ގޭންގު ބަޔަކު އޮފިސަރުގެ ފަހަތުން ހުތުރުބަހުން މުއުމަލާތުކޮށް، ބޭއަދަބީ ބަހުން މުހާތަބުކުރަމުން ފަހަތުން އައިސް، އޭނާއަށް ހަމަލާދިނީ، ޓްރެފިކްގައި މަޑުކޮށްލި ވަގުތު ކަމަށް ކުއްލި މައްސަަލައިގައި ވެެެއެވެ.
އެއްވެސް އަދަބެއް ނުދެވޭނެކަމުގެ ޔަގީންކަމާއިއެކު ފުލުހުންގެ ގާނޫނީ ބާރާއިމެދު ކުށްކުރާ މީހުންގެ ހިތުގައި އެއްވެސް ބިރުވެރިކަމެއް ނެތްކަން ފުލުހުންނަށް ހަމަލާދޭން ފެށުމުން ހާމަވާކަން ޖާބިރު ފާހަގަކުރި އެވެ. ޖާބިރުގެ ކުއްލި މައްސަލާގައި އެދިފައިވަނީ އެމައްސަލައަށް އަވަސް ހައްލެއް މަޖިލީހުން ގެނައުމަށެވެ.
ކުއްލި މައްސަލައާއިމެދު ބަހުސްކުރުމަށް ފެންނަ ކަމަށް ފާސްވެ، މިހާރު ދަނީ ބަހުސްތައް ފަށައިގެން ކުރިއަށެވެ.
ޖާބިރުގެ މި ކުއްލި މައްސަލަ ހުށަހެޅިއިރު، ވައްކަމުގެ ތުހުމަތެއްގައި ގޭންގަކަށް ނިސްބަތްވާ މީހަކު ހައްޔަރުކުރުމުން ގޭންގަކުން މާފަންނު ޕޮލިސް ސްޓޭޝަނަށް ވަދެ ކޮންސްޓަބަލްއަކަށް މަރުގެ އިންޒާރުދިން މައްސަލާގައި ހައްޔަރުކުރި މީހާ އިއްޔެ ވަނީ ދޫކޮށްލާފައެެވެ.
ކޯޓަށް ހާޒިރުކުރުމުން، ކްރިމިނަލް ކޯޓުގެ އިސް ގާޒީ އަހްމަދު ޝަކީލް އޭނާ ދޫކޮށްލީ، އޭނާ ހައްޔަރުކޮށްފައިވަނީ، ކުށުގެ ވެށިން ނޫންކަމަށްވާއިރު، ކޯޓުގެ އަމުރެއް ނުހޯދާ ކަމަށް ބުނެ އެވެ.