އައްޑުއަތޮޅުގެ ދެކުނުން އޮންނަ މޮރީޝަސްގެ ސިޔާދަތުގެ ދަށުގައިވާ ޗާގޯސް އާކިޕެލާގޯގެ އާއި ރާއްޖެ އާއި ދެމެދުގައިވާ ކަނޑުގެ އިހުތިސޯސް ކަނޑައެޅުމުގެ މައްސަލަ މޮރިޝަސްއިން ގާނޫނާބެހޭ ބައިނަލްއަގްވާމީ ޓްރައިބިއުނަލަށް ހުށަހަޅާފައިވަނީ ސެޕްޓެމްބަރު 2019 ގައެވެ.
މިމައްސަލާގެ އަޑުއެހުންތަކުގެ ފުރަތަމަ ބުރުގައި ރާއްޖެ ތަމްސީލުކުރައްވާ ވާހަކަ ދައްކަވަމުން އެޓާނީ ޖެނެރަލް އިބްރާހިމް ރިފްއަތު ވަނީ، މޮރިޝަސްގެ ބޮޑުވަޒީރަށް އޮގަސްޓު މަސްތެރޭ ފޮނުއްވި ސިޓީފުޅެއްގައި ޗާގޯސްގެ މިލްކުވެރިކަމާއި ގުޅޭގޮތުން އދ. ގެ އާންމު މަޖިލީހުން ފާސްކޮށްފައިވާ ގަރާރު ތަންފީޒުކުރުމަށް ވޯޓު ދެއްވާނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހު ދެއްވާފައިވާ ކަމަށް ވިދާޅުވެފަ އެވެ.
މި މައްސަލައަކީ ދިވެހިރާއްޖެ ފަދަ މަސްވެރިކަމަށް ބަރޯސާވާ ގައުމަކަށް މުހިންމު މައްސަލައެއް ކަމަށްވާއިރު، މިކަމުގައި ސަރުކާރު ދޫދީފައިވާކަމަށް ބުނެ ގިނަބަޔަކު ދަނީ ކަންބޮޑުވުން ފާޅުކުރަމުން ނެވެ.
އެގޮތުން މިކަމާއި ކަންބޮޑުވުން ފާޅުކުރައްވާ ސަރުކާރުގެ ކޯލިޝަންތެރޭ ހިމެނޭ ޖޭޕީގެ ލީޑަރު ގާސިމް ނެރެފައިވާ ބަޔާނެއްގައި ވިދާޅުވީ، ރާއްޖޭގެ ބިން ނޫނަސް، ރާއްޖޭގެ ޖައްވާ ކަނޑުންވެސް ކޮޑި އިންޗިއެއްވެސް ގެއްލެން ދިވެހިން ނޭދޭ ކަމަށާއި، ރާއްޖޭގެ ކަނޑުގެ އިންވަކިކުރިޔަސް ބައިނަލްއަގުވާމީ ގާނޫނުތަކުން ރާއްޖެ ލިބޭ އެއްވެސް ހައްގެއް، އިމްތިޔާޒެއް އަދި ނެގެން އޮތް އެއްވެސް ފައިދާއެއް ދޫކޮށްލުމަކީ ދިވެހީންގެ ހުއްދަޔާއިނުލައި އެކަކަށްވެސް ކުރެވޭނެ ކަމެއް ނޫން ކަމަށެވެ.
ގާސިމް ވިދާޅުވީ، ރާއްޖެ އާއި ޗާގޮސްގެ ފުށުއަރާއި ކަނޑުގެ އިން ވަކިކުރުމުގެ މައްސަލާގައި އޮތް ހަމައެކަނި ހައްލަކީ އިކުއިޑިސްޓޭންސް އުސޫލުކަމަށް ދެކި، ބަޔަކު ހަމައެދޭއިރަށް އެގޮތަށް ދީލާލުމަކީ ރާއްޖެއަށް އެންމެ މަސްލަހަތުހުރި ގޮތް ކަމަށް ނުފެންނަ ކަމަށެވެ.
ސަބަބެއްގެ ގޮތުގައި ގާސިމް ފާހަގަކުރެއްވީ އިން ވަކިކުރަން ހުށަހެޅިފައިވަނީ، ރަންޒަމާނުންސުރެ ކަނޑުގެ ރޯއްޖަށް ބަރޯސާވާ މީހުން ދިރިއުޅޭ ރާއްޖެއާއި މިދިޔަ ބައިގަރުނުވެސް އަސްކަރީ ބަނދަރެއްގެ ގޮތުގައި އޮތް، އަދި މުސްތަގުބޮލުގައިވެސް އެފަދަ ތަނެއްގެ ގޮތުގައި އޮތުމުގެ ފުރުސަތު އޮތް(އިތުރު 99 އަހަރަށް އެމެރިކާގެ އަސްކަރީ ބަނދަރަކަށް ކުއްޔަށްދޭން ހުށަހަޅާފައިވާ) ތަނަކާއިދެމެދު އޮތް ސަރަހައްދަކަށް ވުމެވެ.
