އެމަނިކުފާނު އެހެން ވިދާޅުވީ ކޮވިޑް-19 އާ ގުޅޭ ގޮތުން ކެބިނެޓް މިނިސްޓަރުންނާއި، ކަމާބެހޭ އިދާރާތަކުގެ އިސްވެރިންނާއި، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އިސް ޑޮކްޓަރުންނާއެކު ރައީސް އޮފީހުގައި ބޭއްވި ބައްދަލުވުމުގަ އެވެ.
އެ ބައްދަލުވުމުގައި ވަނީ އެހެން ގައުމުތަކުން އަޅަމުން އަންނަ ފިޔަވަޅުތަކާ މެދު މަޝްވަރާކޮށް، ރާއްޖެއިން އެޅެން ހުރި ފިޔަވަޅުތަކާ މެދުވެސް މަޝްވަރާކޮށްފަ އެވެ. އޭގެ އިތުރުން މިހާރު އަޅާފައިވާ ފިޔަވަޅުތައް ވަރުގަދަ ކުރުމާ ބެހޭ ގޮތުން ވެސް މަޝްވަރާ ކުރެއްވި އެވެ.
މި ވައިރަހަށް ޝައްކު ކުރެވިގެން ހަތް މީހެއްގެ ސާމްޕަލް ރާއްޖެއިން ޓެސްޓު ކުރި އެވެ. ނަމަވެސް އެއްވެސް މީހަކު މިހާތަނަށް ޕޮޒިޓިވްވެފައެއް ނުވެ އެވެ. އެއާޕޯޓުގައި ސްކްރީނިން ކުރިއަށް ގެންދާއިރު، ޗައިނާއާއެކު އޮތް ސީދާ ދަތުރުތައް ވަނީ ވަގުތީ ގޮތުން ކެންސަލްކޮށްފަ އެވެ.
