ގއ. ވޮޑަމުއްލާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ، ރައީސް ޔާމީން ފަސް އަހަރަށް ޖަލަށް ލުމާ އެކު ޖޫރިމަނާ ދެއްކުމަށް ކްރިމިނަލް ކޯޓުން ހުކުމް ކުރީ، 2019 ވަނަ އަހަރުގެ ނޮވެމްބަރު 28 ވަނަ ދުވަހު އެވެ.
އެ މައްސަލަ ޔާމީންގެ ފަރާތުން ހައިކޯޓާއި ސްޕްރީމް ކޯޓުގައި އިސްތިއުނާފު ކުރި އެވެ. އަދި އެމައްސަލާގައި 2021 ވަނަ އަހަރުގެ ނޮވެމްބަރު 30 ވަނަ ދުވަހު ސުޕްރީމް ކޯޓުން ވަނީ ކްރިމިނަލް ކޯޓުން އިއްވި ފަސް އަހަރު ދުވަހުގެ ހުކުމް ބާތިލުކޮށް ޔާމީންގެ މައްޗަށް ކުށް ސާބިތުނުވާ ކަމަށް ނިންމާފަ އެވެ.
އެ ހުކުމާ އެކު ރައީސް ޔާމީން މިނިވަންވި ނަމަވެސް، ޔާމީންގެ އެކައުންޓަށް އެސްއޯއެފް ކިޔާ ކުންފުންޏަކުން ޖަމާވި އެއް މިލިއަން ޑޮލަރުގެ ހަގީގަތާއި މެދު ސުވާލު އުފައްދާފައި ވެއެވެ. އަދި އެ ފައިސާ ހޯދުމަށް ފެންނަ ކަމަށް ހުކުމުގައި ބުނެފައި ވެއެވެ.
ހުކުމުގައި ފާހަގަކޮށްފައިވާ ކަންކަމަށް ރިއާޔަތްކޮށް، އެ ފައިސާ ހޯދުމަށް ކުރަމުންދާ މަސައްކަތާއި ގުޅޭގޮތުން ސުވާލުކުރުމުން އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދު "ސީއެންއެމް"އަށް ވިދާޅުވީ، އެފައިސާ ހޯދުމަށް ކަމާބެހޭ އިދާރާތަކާ ގުޅިގެން މަސައްކަތް ކުރަމުންދާ ކަމަށެވެ.
ތަފްސީލު ދެއްވަން އުޒުރުވެރިވީ ނަމަވެސް ވޮޑަމުއްލާ މައްސަލާގައި އެމްއެމްޕީއާރްސީއަށް ލިބެންޖެހޭ ފައިސާއެއް އޮތް ނަމަ އެ ފައިސާ ހޯދުމަށް އެޓާނީ ޖެނަރަލްގެ ފަރާތުން ދައުވާ ކުރައްވާނެ ކަމަށް ތޮއްޔިބު ވިދާޅުވި އެވެ. އެ މަސައްކަތް ކުރެވޭނެ ސީދާ ތާރީހެއް ވިދާޅެއް ނުވެ އެވެ.
ތޮއްޔިބު ވިދާޅުވީ، މީގެ ކުރީގެ އެފަދަ މައްސަލަތައް ވެސް ކުރިއަށް ގެންގޮސްފައިވަނީ، ދައުލަތުގެ ފަރާތުން އެޓާނީ ޖެނަރަލްގެ ލަފާފުޅާއި އެއްގޮތަށް ކަމަށެވެ.
އެމައްސަލަ އޭޖީ އޮފީހާއި ގުޅިގެން ކުރަމުންދާ ކަމަށް އެމްޑީ ތޮއްޔިބު ވިދާޅުވި ނަމަވެސް، އޭޖީ އޮފީހުން ”ސީއެންއެމް“ އަށް ބުނީ، އެމައްސަލައިގައި ބަލަންޖެހޭ ކަންކަން ބެލުމަށް ފަހު، އަމަލު ކުރަން ފެންނަ ގޮތް އެމްއެމްޕީއާރްސީއަށް އަންގާފައިވާ ކަމަށެވެ.
ޔާމީން މިނިވަން ކުރަން ސްޕްރީމް ކޯޓުން އިއްވި ހުކުމުގައި އެއް މިލިއަން ޑޮލަރުގެ ހަގީގަތް ހޯދައި ދައުލަތައް ލިބެންޖެހޭ ފައިސާ ހޯދުމުގެ މަސައްކަތް ކުރުމަށް ލަފާދިން ނަމަވެސް އަހަރެއްވީ އިރު އެމައްސަލާގައި ދައުވާކުރަން މިހާތަނަށް ކޯޓަށް އެމްއެމްޕީއާރްސީން ހުށަހަޅާފައެއް ނުވެ އެވެ. އެއް މިލިއަން ޑޮލަރަކީ ދައުލަތުގެ ފައިސާ ކަމަށް ސާބިތުނުކޮށްދެވިއްޖެނަމަ، އެ ފައިސާ އޮޓަމެޓިކަލީ ޔާމީންގެ އެކައުންޓަށް ޖަމާވާން ޖެހޭނެ އެއްބަަސްވުމެއް ދައުލަތާ އެކު އޮތްކަން މިފަހުން ޔާމީން ހާމަކުރައްވާފައިވެސް ވެއެވެ. އެހެންވެ އެ ފައިސާ ހޯދުމަށް ކޯޓަށް ދާނެކަމަށް ޔާމީން ވަނީ މިފަހުން ވިދާޅުވެފަ ވެސް މެއެވެ.
އެއް އަހަރު ދުވަސްވީއިރު އެ ފައިސާ ހޯދުމަށް ދައުލަތުން ކުރަމުންދާ މަސައްކަތުގެ ތަފްސީލެއް ހާމަކޮށްފައި ނުވާއިރު، މޮޑަވުއްލާ މައްސަލާގައި އެސްއޯއެފް ކުންފުންޏަށް ދައުވާ ނުކުރުމަށް ވެސް ދައުލަތުން ވަނީ ނިންމާފަ އެވެ. އެސްއޯއެފް ކުންފުންޏަކީ ހުކުމުގައި ސުވާލު އުފެއްދި އެއް މިލިއަން ޑޮލަރު ޔާމީންގެ އެކައުންޓަށް ޖަމާކުރި ކުންފުންޏެވެ.
ރާއްޖޭގެ ތާރީހުގައި މިހާތަނަށް ހިންގި އެންމެ ބޮޑު ހިޔާނާތް ކަމަށްވާ އެމްއެމްޕީއާރުސީ ހިޔާނާތުގެ ފައިސާ އެކި ފަރާތްތަކަށް ބެހުމަށް ބޭނުން ކުރީ ވެސް އެސްއޯއެފް އެކައުންޓެވެ. ފްރީޒްކޮށްފައި އޮތް އެ އެކައުންޓު މިއަހަރުގެ އޮގަސްޓު މަސްތެރޭ ވަނީ ދޫކޮށްލާފަ އެވެ.
