އެގޮތުން ޖިހާދުގެ މައްޗަށް ދައުވާކޮށްފައިވަނީ ޖިހާދު ދިރިއުޅުއްވުމަށް ދައުލަތުގެ ފަރާތުން “ރެހެންދި 3” ގެ ދެ ފްލެޓް ހަމަޖައްސައިދީފައި އޮތްއިރު، ރިޔާސީ ދައުރު ހަމަވުމަށްފަހު، އެތަން ހުސްކުރަން ދައުލަތުން އެންގުމުންވެސް އެތަން ހުސްނުކޮށް، ޤާނޫނީ ހައިސިއްޔަތެއް ނެތި އެއް އަހަރާއި ތިން މަސް ވަންދެން އެތަން ބޭނުންކުރެއްވި ކަމަށެވެ. އަދި އެ މުއްދަތަށްވާ ކުލި ހޯދުމުގެ ހައްގު ދައުލަތަށް ލިބިގެންވާކަމަށް ކަނޑައަޅައިދީ، ނުހައްގު މުއްސަނދިކަން ހޯދާފައިވާތީ، އެތަނުގެ ކުއްޔާއި މެއިންޓެނަންސް ފީ އާއި ޔުޓިލިޓީ ފީސްގެ ގޮތުގައި 1.1 މިލިއަން ރުފިޔާ ހޯދުމަށް ދައުވާގައި ވަނީ އެދިފައެވެ.
މިމައްސަލައާއި ގުޅިގެން ޖިހާދު ވަނީ އޭނާގެ ހިތުގެ އުދާސްތައް ބަންޑުން ކޮށްލާފައެވެ. އަދި ޖިހާދު ވަނީ އޭނާގެ މައްޗަށް ކުރެވޭ ތުހުމަތުތައް ދޮގު ކުރައްވާފައެވެ.
ސީއެންއެމް އަށް މައުލޫމާތު ދެއްވަމުން ޖިހާދު ވިދާޅުވީ، ރައީސް ޔާމީންގެ ސަރުކާރުން އެމަނިކުފާނު ދިރިއުޅުމަށް ރެހެންދި3 ގެ ދެ ފްލެޓެއް ހަމަޖައްސައި ދިނީ ކުރިން އެމަނިކުފާނު އުޅުއްވި ތަނުގައި ހުރި ދަތިތަކާއި ގުޅިގެން ކަމަށެވެ. އެގޮތުން ރެހެންދީގެ ދެ އެޕާޓްމެންޓްގެ ތެރެއިން އެއް އެޕާޓްމެންޓަކީ ސެކިއުރިޓީނަށް ހާއްސަ ތަނެއްކަމަށްވެސް ވިދާޅުވި އެވެ.
ޖިހާދު ވިދާޅުވީ، އެ ދެ ތަން ފައިސާ ދައްކައިގެން މިލްކު ކުރެވޭ ގޮތަށް ހެދުމަށް ރައީސް ޔާމީނާއި އެކު މަޝްވަރާ ކުރެއްވި ކަމަށެވެ. އަދި އެކަމާއި ގުޅޭގޮތުން އެއްބަސްވުމެއް ނުހެދި އުޅެނިކޮށް ސަރުކާރު ބަދަލުވީ ކަމަށް ވިދާޅުވި އެވެ.
ޖިހާދު ވިދާޅުވީ ވެރިކަން ބަދަލުވުމާއި އެކު އޭނާ އެތަނުން ނިކުމެފައިވާ ކަމަށެވެ.
މީގެ އިތުރުން ޖިހާދު ވިދާޅުވީ އެޕާޓްމެންޓްގެ ކަންކަމުގައި މިހާރު ރައީސް އިބްރާހިމް މުހައްމަދު ސޯލިހާއި ވެސް މަޝްވަރާ ކުރެއްވި ކަމަށެވެ. އަދި ބަންޑާރަނައިބާއި އެކަމުގައި މަޝްވަރާ ކުރުމަށްފަހު ޖަވާބެއް ދެއްވާނެ ކަމަށް ރައީސް ވިދާޅުވި ކަމަށް ޖިހާދު ވިދާޅުވި އެވެ.
އެހެން ނަމަވެސް އެކަމުގައި ހައުސިން މިނިސްޓްރީން އެންގީ ތަޅުދަނޑު ހަވާލު ކުރުމަށްކަމަށާއި އެހެން ނަމަވެސް ހައުސިން މިނިސްޓްރީއަށް ތަޅު ދަނޑި ހަވާލު ކުރެވެން ނެތްކަމަށް ވިދާޅުވި ކަމަށް ޖިހާދު ވިދާޅުވި އެވެ.
ޖިހާދު ވިދާޅުވީ އޭގެ ފަހުން ރައީސް އޮފީހުގެ ސިޓީއެއް ލިބުނު ކަމަށާއި، އަދި ސިޓީ ލިބުމާއި އެކު މުލިއާގެއާ ތަޅުދަނޑި ހަވާލުކުރެއްވި ކަމަށެވެ.
ޖިހާދު ވަނީ ދައުލަތަށް 30 އަހަރު ކޮށްދިން ހިދުމަތުގެ އަގަކީ ހުތުރު ދޮގު ބަދުނާމެއް އެޅުވުމަށްފަހު ދައުވާކުރުންތޯ ސުވާލު ކުރައްވާފައެވެ. ތިން ފަހަރު ރާއްޖޭގެ ފިނޭންސް މިނިސްޓަރުކަން ކުރައްވާފައިވާ ޖިހާދު ވަނީ ނުހައްޤު އަދަބެއް ދޭންޖެހޭ ސަބަބަކީ ކޮބައިތޯ ސުވާލު ކުރައްވާފައެވެ.
ނުހައްގު މުއްސަނދިކަން ހޯދާފައިވާކަމަށް ބުނެ ޖިހާދުގެ މައްޗަށް ދައުވާކޮށްފައިވާއިރު ޖިހާދު މިވަގުތު ހުންނެވީ ސިއްހީ ފަރުވާއަކަށް ރާއްޖޭން ބޭރުގައެވެ.
