ގއ. ވޮޑަމުއްލާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށް ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރިކަން ސާބިތުވެ، ރައީސް ޔާމީން އަށް އިއްވި ފަސް އަހަރުގެ ޖަލު ހުކުމް 2021 ވަނަ އަހަރުގެ ނޮވެމްބަރު 30 ވަނަ ދުވަހު ސްޕްރީމް ކޯޓުން ވަނީ ބާތިލުކޮށްފަ އެވެ. 

އެކަމަކު، އެސްއޯއެފް ކިޔާ ކުންފުންޏަކުން ޔާމީންގެ އެކައުންޓަށް ޖަމާވި އެއް މިލިއަން ޑޮލަރުގެ ހަގީގަތާއި މެދު ސުވާލު އުފައްދައި، އެ ފައިސާއަކީ ދައުލަތަށް ލިބެންޖެހޭ ފައިސާއެއް ނަމަ އެ ފައިސާ އާއި އެ ފައިސާ އިންްވެސްޓް ކުރުމުގެ ސަބަބުން ފައިދާއެއް ލިބިފައިވާ ނަމަ އެ ފައިދާއެއް ހިމެނޭހެން ހޯދުމުގެ ހައްގު ދައުލަތަށް ލިބިފައިވާ ކަމަށް ހުކުމުގައި ބުނެފައި ވެއެވެ. އަދި އެފައިސާ ހޯދުމަށް ފެންނަ ކަމަށް ބުނެފައި ވެއެވެ. 

މި ހުކުމަށް އަހަރެއްވީއިރު މިކަމާ ގުޅޭގޮތުން ކުރަމުންދާ މަސައްކަތާއި ގުޅޭގޮތުން "ސީއެންއެމް" އިން އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދާއި ސުވާލުކުރުމުން ވިދާޅުވީ، އެމަސައްކަތް އޭޖީ އޮފީހާއި ގުޅިގެން ކުރަމުންދާ ކަމަށެވެ. އަދި އެކަން ކުރާނީ އޭޖީ އޮފީހުގެ ލަފާގެ މަތިން ކަމާއި، ދޭންޖެހޭ އެހީއެއް ނުވަތަ ކުރަންޖެހޭ ކަމެއް ކުރާނެ ކަމަށް ވިދާޅުވި އެވެ. 

މިކަމާއި ގުޅިގެން އޭޖީ އޮފީހުން މިއަދު ސީއެންއެމް އަށް ބުނީ، އެމައްސަލާގައި އޭޖީ އޮފީހުން ބަލަންޖެހޭ ކަންކައި ބަލައި، އެ ފައިސާ ހޯދުމަށް އެމްއެމްޕީއާރްސީއަށް ލަފާ އަރުވާފައި އޮންނަތާ ހަ މަސްވެފައިވާ ކަމަށެވެ. 

ޔާމީން މިނިވަން ކުރަން ސްޕްރީމް ކޯޓުން އިއްވި ހުކުމުގައި އެއް މިލިއަން ޑޮލަރުގެ ހަގީގަތް ހޯދައި ދައުލަތައް ލިބެންޖެހޭ ފައިސާ ހޯދުމުގެ މަސައްކަތް ކުރުމަށް ލަފާދިން ނަމަވެސް، އަހަރެއްވީ އިރު އެމައްސަލާގައި ދައުވާކުރަން މިހާތަނަށް ކޯޓަށް އެމްއެމްޕީއާރްސީން ހުށަހަޅާފައެއް ނުވެ އެވެ. 

އެ އެއް މިލިއަން ޑޮލަރަކީ ދައުލަތުގެ ފައިސާ ކަމަށް ސާބިތުނުކޮށްދެވިއްޖެނަމަ، އެ ފައިސާ އޮޓަމެޓިކަލީ ޔާމީންގެ އެކައުންޓަށް ޖަމާވާން ޖެހޭނެ އެއްބަަސްވުމެއް ދައުލަތާ އެކު އޮތްކަން މިފަހުން ޔާމީން ހާމަކުރައްވާފައިވެސް ވެއެވެ. އެހެންވެ އެ ފައިސާ ހޯދުމަށް ކޯޓަށް ދާނެކަމަށް ޔާމީން ވަނީ މިފަހުން ވިދާޅުވެފަ ވެސް މެއެވެ.  

މިހެން މިކަން އޮތްއިރު، އެ ފައިސާ ހޯދުމަށް އޭޖީ އޮފީހުން އެމްއެމްޕީއާރްސީއަށް ލަފާ އަރުވާފައި އޮންނަތާ ވެސް ހަ މަސް ވެގެން ދިޔައިރު، މިކަމުގައި އެމްއެމްޕީއާރްސީން ކުރަމުންދާ މަސައްކަތުގެ ތަފްސީލެއް ވެސް ހާމަކޮށްފައެއް ނުވެ އެވެ. އަދި، މައްސަލަ ކޯޓަށް ހުށަހެޅުން ލަސްވަމުންދާ ސަބަބުވެސް އެމްއެމްޕީއާރްސީން ސާފުކޮށެއް ނުދެ އެވެ.