މެސީއާ ރޮނާލްޑޯގެ ތެރެއިން އެންމެ މޮޅީ ކޮން ކުޅުންތެރިއެއްތޯ ކުރާ ސުވާލު މި ނިމުނު 2022 ވަނަ އަހަރާއެކު ނިމުނީއެވެ. 2022 ވަނަ އަހަރު ވެގެން ގޮސްފައިވަނީ ރޮނާލްޑޯއަށް އުނދަގޫ އެހެންނަމަވެސް މެސީގެ އެންމެ ކާމިޔާބު އަހަރަށެވެ.
ބާސެލޯނާ ދޫކޮށް ޕީއެސްޖީއަށް ބަދަލުވީ ފަހުން ކުރިމަތިވީ ފާޑު ކިޔުންތަކަށް މެސީ ޖަވާބު ދިނީ ވޯލްޑްކަޕުގެ ރަން މެޑަލުންނެވެ.
އެކަމަކު ރޮނާލްޑޯއަށް 2022 ވަނަ އަހަރު ވެގެން ގޮސްފައިވަނީ ހުރިހާ ގޮތަކުންވެސް ހިތްދަތި އަދި އެހާމެ އުނދަގޫ އަހަރަކަށެވެ. ވޯލްޑްކަޕަށް ޕޯޗުގަލް ކޮލިފައިވީވެސް ފަހު ވަގުތުއެވެ. ކްލަބު ފުޓްބޯޅައިގައި މެންޗެސްޓަ ޔުނައިޓެޑު ދޫކޮށްލަން ބޭނުންވެ އެހެން ކްލަބެއް ހޯދަން ކުރި މަސައްކަތް ފަނުފުލުން ގޮސް އަދި އެންމެ ފަހުން ޔުނައިޓެޑުންވެސް ބޭރުކޮށްލީއެވެ.
ވޯލްޑްކަޕުވެސް ހުސް އަތާ ނިންމާލިއިރު މުޅި ޓީމު ތެރޭގައި ރޮނާލްޑޯ ވެފައިވަނީ ބޮޑު ފަންޏަކަށެވެ. މި ހުރިހާ ކަމެއްގެ ތެރެއިން ރޮނާލްޑޯ އަހަރު ނިންމާލީ ސައުދީގެ ކްލަބަކަށް ބަދަލުވެގެންނެވެ. ޗެމްޕިއަންސް ލީގަށް މެންޗެސްޓަ ޔުނައިޓެޑު ކޮލިފައިނުވީތީ އެކަމާ ހެދި ޗެމްޕިއަންސް ލީގު ކުޅެން ބޭނުން ވެގެން ކްލަބު ދޫކޮށްލަން ނިންމި ރޮނާލްޑޯ ގޮސް ނިމުނީ ޔޫރަޕުންވެސް ބޭރަށެވެ.
