މިމަހުގެ އެއްވަނަ ދުވަހުގެ 09:10 ހާއިރު، އެ ސަރަހައްދަށް ގިނަ އަދަދެއްގެ ކަޅުތެޔޮ އެޅިފައި ހުރި ކަމުގެ މައުލޫމާތު ލިބިގެން އެމްއެންޑީއެފް ކޯސްޓްގާޑުންނާއި، މާލެ އޭރިއާ މެރީންސް އާއި މެރިން ޕޮލީސްގެ އިތުރުން މާލެ ސިޓީ ކައުންސިލްގެ ފަރާތުން އެ ކަޅުތެޔޮ އެތަނުން ނާނގާ ސާފުކުރުމުގެ މަސައްކަތް ކުރަމުންދިޔަ އެވެ. އިއްޔެ އެމްއެންޑީއެފްއިން ބުނިގޮތުގައި މިހާތަނަށް ގާތްގަނޑަކަށް 700 ލީޓަރުގެ ކަޅުތެޔޮ އެސަރަހައްދުން ވަނީ ނަގާފަ އެވެ. މާދަމާވެސް އެމަސައްކަތް ކުރިއަށް ދާނެ އެވެ.
އީޕީއޭގެ ޑިރެކްޓާ ޖެނަރަލް އިބްރާހިމް ނައީމް މިއަދު "ސީއެންއެމް" އަށް ވިދާޅުވީ، އެތަނަށް ކަޅުތެޔޮ އެޅުނު ގޮތެއް ހޯދުމުގެ މަސައްކަތް އެ އޮތޯރަޓީން މިހާރު ކުރަމުންދާ ކަމަށާއި، ފަޅުތެރެއަށް އެކި ޒާތުގެ ކުންޏާއި ތެޔޮފަދަ ތަކެތި އެޅުން "ހައްދުން ނައްޓާފައި" ވާ ކަމަށެވެ.
ނައީމް ވިދާޅުވީ، ކޮންމެ ކަމެއްގައި ގާނޫނުތަކަށް އަމަލުކުރުވުމަށް ފަހަތުގައި ބަޔަކު ބަހައްޓައިގެން ކަންކުރުމަށްވުރެ އެފަދަ މައްސަލަތަކަށް އޮތް ދާއިމީ ހައްލަކީ، އަމިއްލަ ފަރުދީ ޒިންމާއެއް ކަމުގައި ދެކިގެން އެފަދަ ކަންކަން ކުރުމާއި، ކުނިބުނިން މާހައުލު ތަގައްޔަރުކުރުމާއި އަމިއްލައަށް ދުރުވުން ކަމަށެވެ.
އެ ސަރަހައްދަށް ކަޅުތެޔޮ އެޅިފައިވާ މައްސަލަ ފެންމަތިވި ދުވަހު، މާލޭ ސިޓީ ކައުންސިލުން "ސީއެންއެމް" އަށް ބުނިގޮތުގައި، އެ ސަރަހައްދަށް ދޭތެރެ ދޭތެރެއިން ކަޅުތެޔޮ އެޅެ އެވެ. މި ކަޅުތެޔޮ އެޅޭކަމަށް ކައުންސިލަށް މައުލޫމާތު ލިބިފައިވަނީ، ލައްގާ ކަޅުހަން ތަކަކުން ކަމަށް ކައުންސިލުން އެދުވަހު ބުންޏެވެ. ނަމަވެސް މި ކަޅުހަންތަކުގެ ހަގީގަތެއް ނުވަތަ އަންނަ ދިމާލެއް ކައުންސިލަކަށް ވެސް ސީދާ ބުނާކަށް ނޭނގެ އެވެ.
މިކަމާއި ގުޅިގެން ނައީމް ވިދާޅުވީ، އެފަދަ މައުލޫމާތެއް އެ އޮތޯރަޓީއަށް ނުލިބޭ ކަމަށެވެ. އެކަމަކު، އެތަނަށް އެޅިފައިވާ ތެލުގެ މިންވަރަށް ބަލާއިރު، އެއީ އެންމެ ކަޅު ހަމަކުން އެޅޭނެ ތެޔޮ ނޫންކަން އޭނާ ފާހަގަކުރެއްވި އެވެ. އަދި މީގެ ކުރިން އެހާ ގިނައިން ތެޔޮ އެސަރަހައްދަށް އެޅިފައި ނުވާކަންވެސް ފާހަގަކުރެއްވި އެވެ.
