އެމްޑީޕީގެ ޕްރައިމަރީ ބޯމަތިވުމުން ކެމްޕެއިނަށް ނުކުންނަވައި، ހިޔާ ފްލެޓްތަކަކީ މާލޭ ސަރަހައްދުގައި ބިކަ ހާލުގައި ދިރިއުޅެމުން ދިޔަ މީހުންނަށް ބޯހިޔާވަހިކަމެއް ލިބުމަކީ އެމީހުންނަށް ބޮޑު ފަސޭހައަކަށް ވާނެ ކަމަށް ގަބޫލުކުރައްވާ ކަމަށް ނަޝީދު ވިދާޅުވިއިރު، ކުރިން ވިދާޅުވީ ކީކޭތޯ ބަލާލާއިރު ކުރިން ނަޝީދު އެތަން ސިފަ ކުރެއްވީ ދަރަނީގެ ދަންތުރައެއްގެ ގޮތުގައެވެ.
ކޮވިޑުގެ ތެރޭގައި 2020 ވަނަ އަހަރުގެ ޖޫން މަހުގެ ހަތްވަނަ ދުވަހު ރައީސް ނަޝީދު ކުރެއްވި ޓްވީޓެއްގައި ވިދާޅުވީ، އެއީ "ދަރަނީގެ ދަންތުރަ" އެއް ކަމަށެވެ. އެ ދުވަހު ނަޝީދު ވިދާޅުވީ ފްލެޓްތައް އިމާރާތް ކޮށްފައި ވަނީ 500 އަކަފޫޓުގެ ކުދި ކޮތަރުކޮށިތަކެއްގެ ގޮތަށް ކަމަށާއި އެއިން ތަނެއް ހަދަން ހަރަދުކުރި ކަމަށް ބުނަނީ އަކަަފޫޓަކަށް 1،900 ރުފިޔާ ކަމަށެވެ.
އޭގެ ދެ އަހަރު ފަހުން، މިހާރު ހިޔާ ފްލެޓް އާބާދުވެ، އެތައް ހާސް މީހުންނެއް އެތަނުގައި ދިިރިއުޅެން ފަށައިފިއެވެ. އެތައް ބަޔަކު އެތަނުގައި ދިރިއުޅެނީ އަމިއްލަ ބޯހިޔާވަހިކަމެއްގައި އުޅުމުގެ ހިތްހަމަ ޖެހުމާއި އުފަލާއެކު އެވެ. މިއަދު ނަޝީދުގެ ވާހަކަވެސް ބަދަލުވެއްޖެއެވެ.
