ނަޝީދަށް އަމާޒުކޮށް ރައީސް ސޯލިހުގެ ވަރުގަދަ ބަހުގެ ހަމަލާތަކެއް އަނެއްކާވެސް މިއައީ ކެމްޕެއިން ފޯރީގައެވެ. ރައީސް ސޯލިހްގެ ރައްދު މި ފަހަރު އައީ އެ މަނިކުފާނު އައްޑޫ ސިޓީއަށް މިއަދު ފެށްޓެވި ދަތުރުފުޅުގައެވެ.
އައްޑޫގައި ވާހަކަ ދައްކަވަމުން ރައީސް ސޯލިހް، ރައީސް ނަޝީދުގެ ވެރިކަމުގައި ފެއްޓެވި ދަތުރުފަތުރުގެ ނިޒާމްގެ ކަންތައްތައް ދިޔަގޮތް ސިފަކުރެއްވީ ބޮޑު ސަކަރާތް ގަނޑެއްގެ ގޮތުގައެވެ.
ރައީސް އިޝާރާތް ކުރެއްވީ ރައީސް ނަޝީދުގެ ވެރިކަމުގައި ދަތުރުފަތުރުގެ ނިޒާމު ހިންގުމަށް ފަޅު ރަށްތައް ލިބޭ ގޮތަށް އަމިއްލަ ފަރާތްތަކާއެކު ހިންގަން މަސައްކަތް ކުރި ޕްރޮޖެކްޓަށެވެ. އެ ޕްރޮޖެކްޓް އޭރު އެންމެ ރަނގަޅަށް ނުހިނގި ނަމަވެސް ބައެއް ފަރާތްތަކުން ރަށްތައް ހޯދައި ތަރައްގީކުރިއެވެ. އަދި ބައެއް ފަރާތްތަކުން އެއްބަސްވުމާ އެއްގޮތަށް ޕްރޮޖެކްޓް ނުހިންގައިގެން އެއްބަސްވުން ބާތިލު ކުރުމުން ދައުލަތުން ބަދަލު ހޯދަން ދައުވާ ކުރިއެވެ. ބޮޑެތި އަދަދުތަކުން ބަދަލު ހޯދަން ދައުވާ ކުރި ބައެއް މައްސަލަތައް އަދިވެސް ކޯޓު މަރުހަލާގައި އެބަހިނގައެވެ.
