އިންޑިއާ އެމްބަސީގައި ރޯކޮށްލުމަށް އޭނާގެ ނަމުގައިވާ ޓްވިޓާ އެކައުންޓަކުން ގޮވާލި މައްސަލާގައި އައްބާސް ހައްޔަރުކުރީ މިދިޔަ ޑިސެމްބަރު 25 ވަނަ ދުވަހު އެވެ.
ހައްޔަރުކޮށް ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ތިން ފަހަރެއްގެ މަތިން ބަންދުގެ މުއްދަތު އިތުރުކޮށްދިން އައްބާސް ބަންދުން ދޫކޮށްލީ މިއަދު އެވެ. ފުލުހުން ބުނިގޮތުން އޭނާ ބަންދުން ދޫކޮށްލީ ބަންދުގެ މުއްދަތު ޖެހުމަށް މިއަދު ކޯޓަށް ހާޒިރު ކުރުމުން ނެވެ. ބަންދުން ދޫކޮށްލީ ޝަރުތުތަކާއިއެކު ކަމަށް ފުލުހުން ބުނިނަމަވެސް އެ ޝަރުތުތަކުގެ ތަފްސީލެއް ނުދެ އެވެ.
އައްބާސް އޭރު ކުރި ޓްވީޓެއްގައި ބުނީ އައްޑޫގައި ފެބްރުއަރީ އަށް ވަނަ ދުވަހު ހުޅުޖެހީ އިންޑިއާގެ އޯޑަރަށް ކަމަށާއި، އެކަމުގެ ބަދަލު އަދި އޮތީ ނުހިފިކަމަށެވެ. ބަދަލު ހިފުން އިންޑިއާ އެމްބަސީން ފަށަން ފެންނަ ކަމަށް އެ ޓްވީޓުގައި ބުނެފައިވެ އެވެ.
އައްބާސްވަނީ ރައީސް ވަހީދުގެ ވެރިކަމުގައި ރައީސް އޮފީހުގެ ތަރުޖަމާނުކަމާއި ފިނޭންސް މިނިސްޓްރީގެ ސްޓޭޓް މިނިސްޓަރުކަން ކުރައްވާފަ އެވެ. އަދި ރައީސް ޔާމީންގެ ވެރިކަމުގައި ކަސްޓަމްސްގެ އެންމެ އިސްވެރިޔާގެ މަގާމްވެސް އައްބާސް އަދާ ކުރައްވާފައި ވެއެވެ.
