10 ޑިސެމްބަރު 2020ގައި އިފްތިތާހުކުރި ރިވާސް ޕެޓް ލޮޖިސްޓިކްސް ޕްރޮޖެކްޓް ކުރިއަށް ގެންދަނީ، މާލޭ އެރޭޓެޑް ވޯޓާ ކޮމްޕެނީ ލިމިޓެޑް (ކޮކާކޯލާގެ ބުއިންތައް ރާއްޖޭގައި ބަންދުކުރާ ފަރާތް)، ހެޕީ މާކެޓް ޕްރައިވެޓް ލިމިޓެޑް ('ލައިފް' ބްރޭންޑުގެ މިނަރަލް ފެން އުފައްދާ ކުންފުނި) އަދި އައިލެންޑް ބެވަރޭޖަސް މޯލްޑިވްސް ('ތާޒާ' ބްރޭންޑުގެ މިނަރަލް ފެން އުފައްދާ ކުންފުނި)އާ އެކު ވަރުގަދަ ޕާޓްނަޝިޕެއްގެ ދަށުންނެވެ. މި ޕާޓްނަޝިޕް ގާއިމްކޮށްފައި ވަނީ، އެ ކުންފުނިތަކުގެ އަމިއްލަ އިސްނެގުމުގައި، 100 އިންސައްތަ ރީސައިކަލް ކުރެވޭ ޕެޓް އަލުން ބޭނުންކުރުމުގެ މަގްސަދުގަ އެވެ.

މި މަޝްރޫއު ފެށިގެން ދިޔައީ، މާލެ ސަރަހައްދުގައި ރެސްޓޯރަންޓްތަކާއި ކެފޭ ފަދަ ތަންތަން ހިމެނޭ ގޮތަށް 263 އަށް ވުރެ ގިނަ ރީޓެއިލް އައުޓްލެޓްތަކުން އުކާލާ ޕެޓް ފުޅި – 100 އިންސައްތަ ރީސައިކަލް ކުރެވޭ އަދި ރާއްޖޭގެ އިގްތިސާދަށް އިތުރު ކުރިއެރުމެއް ގެނެސްދިނުމުގެ ގާބިލުކަން ހުރި މި ފުޅިތައް – ކޮންމެ ދުވަހަކު އެއްކުރުމުގެ ތެރެއިންނެވެ. ޕެޓް ރިވާސް ލޮޖިސްޓިކްސް ޕްރޮޖެކްޓް މީގެ ގާތްގަނޑަކަށް ދެ އަހަރުދުވަސް ކުރިން ފެށުނީއްސުރެ މިހާތަނަށް 65،000 ކިލޯއަށް ވުރެ ގިނަ ޕެޓް ވަނީ އެއްކޮށްފަ އެވެ.

ޕެޓް ރިވާސް ލޮޖިސްޓިކްސް ޕްރޮޖެކްޓް އައްޑޫ ސިޓީއަށް ފުޅާކުރުމަށް މޯޕާ އާއި އައްޑޫ ސިޓީ ކައުންސިލާ ދެމެދު 2022 ވަނަ އަހަރުގެ އޮގަސްޓް މަހު އެއްބަސްވުމެއްގައި ސޮއިކޮށް، މޫދަށް އުކާލެވޭ ޕްލާސްޓިކާ ދެކޮޅަށް މަސައްކަތް ކުރުމުގެ އަމާޒަށް ވާސިލުވުމަށް ވަނީ މަގު ފަހިކުރެވިފަ އެވެ. މި މަޝްރޫއުގައި ކާބޯތަކެތީގެ ހިދުމަތް ދިނުމަށް އައްޑޫގައި ހިންގާ 50 އިންސައްތައަށް ވުރެ ގިނަ ތަންތަން ވަނީ ބައިވެރިވެފަ އެވެ.

ޕެޓް ރިވާސް ލޮޖިސްޓިކްސް ޕްރޮޖެކްޓް އައްޑޫ ސިޓީއަށް ފުޅާކުރުމުގެ މަސައްކަތުގައި މައިގަނޑު ގޮތެއްގައި އެހީތެރިކަން ފޯރުކޮށްދެނީ ކަލެކްޝަން ޕާޓްނަރެއްގެ ގޮތުގައި މަސައްކަތްކުރާ މާލޭ އެރޭޓެޑް ވޯޓާ ކޮމްޕެނީންނެވެ. ޕެޓް ފުޅި އެއްކުރުމުގެ އިތުރުން، ޕެޓް ފުޅީގައި ބަންދުކޮށްފައި ހުންނަ ތަކެތި ބޭނުންކުރުމާއި އުކާލުމާއި އެއްކުރުން އަދި ރީސައިކަލް ކުރުމާ ގުޅޭ އަހުލާގީ ބަދަލުތައް ގެނައުމަށް ވެސް މި ޕްރޮޖެކްޓްގެ ޒަރީއާއިން މަސައްކަތް ކުރެވި، ކުނި ވަކިކުރުމާއި މެނޭޖްކުރުމުގެ ސަބަބުން ލިބޭ ދުރު ރާސްތާގެ ފައިދާތަކަށް ހޭލުންތެރިކަން އިތުރުކުރުމަށް މުޖުތަމައުގެ ބައިވެރިވުން އޮންނަ ޕްރޮގްރާމްތައް ވެސް ހިންގޭނެ އެވެ.

މި މަޝްރޫއުގެ ދަށުން އެއްކުރާ ޕެޓް ފުޅިތައް – މުޅި ދުނިޔޭގައި ވެސް އެންމެ ފުޅާ ދާއިރާއެއްގައި ރީސައިކަލްކުރެވޭ ޕްލާސްޓިކްގެ ބާވަތް – ޕާލޭ މޯލްޑިވްސްއާ ހަވާލުކޮށްގެން ރީސައިކަލްކޮށް، ބްރޭންޑުތަކުގެ ބޫޓާއި ފަތަން ދާއިރު ލާ ހެދުން އަދި އެހެނިހެން ހެދުން ފަދަ އާންމު ދިރިއުޅުމުގައި ބޭނުންކުރާ ތަފާތު ތަކެއްޗަށް ބަދަލުކުރެ އެވެ. ކަމާ ގުޅުންހުރި އެކި ފަރާތްތަކުން އެކައްޗެއް ކިޔައިގެން ހިންގޭ މި ހަރަކާތަކީ، ޕްލާސްޓިކްއާ ގުޅޭ ގޮތުން ވަށާޖެހޭ އިގްތިސާދީ ވިސްނުމެއް އާލާކޮށް، ރައްޔިތުންގެ ދިރިއުޅުމާއި މުޖުތަމައު އަދި ދުނިޔެއަށް ބަދަލުތަކެއް ގެނެސްދިނުމަށް ގިނަ ކުންފުނިތަކާއި ރީޓެއިލަރުން އެއް ތަންވެ، އެއް ވިސްނުމެއްގައި މަސައްކަތްކުރުމުގެ ފުރުސަތު ތަނަވަސްކޮށްދޭ މަޝްރޫއެކެވެ.

ޕްލާސްޓިކް ރިވާސް ލޮޖިސްޓިކްސް ޕްރޮޖެކްޓަކީ މޯޕާ އިން އިސްނަގައިގެން، މާލޭ އެރޭޓެޑް ވޯޓާ ކޮމްޕެނީ އާއި އައިލެންޑް ބެވަރޭޖަސް މޯލްޑިވްސް ޕްރައިވެޓް ލިމިޓެޑާއި އިންޓަނޭޝަނަލް ބެވަރޭޖަސް ކޮމްޕެނީ ޕްރައިވެޓް ލިމިޓެޑް ފަދަ ބައިވެރިންގެ އެހީތެރިކަމާ އެކު ކުރިއަށްގެންދާ މައިގަނޑު ތިން މަޝްރޫއުގެ ތެރެއިން އެއް މަޝްރޫއެވެ. ދެވަނަ މަސައްކަތެއްގެ ގޮތުން އައިލެންޑް ޕެޓް ކަލެކްޝަން ޕްރޮޖެކްޓްގެ ދަށުން ޕެޓް ފުޅި އެއްކުރުމުގެ މަސައްކަތް އަތޮޅުތަކަށް ފުޅާކޮށްފައި ވާއިރު، މިހާރު ތިން ރަށެއްގައި މި މަސައްކަތް އަންނަނީ ހިންގަމުންނެވެ. އެންމެ ފަހުން އިފްތިތާހުކުރި ރިސޯޓް ޕެޓް ކަލެކްޝަން ޕްރޮޖެކްޓަކީ، ޕްލާސްޓިކް ފުޅި އެއްކުރުމަށް ކުރަމުން އަންނަ މަސައްކަތް އިތުރަށް ފުޅާކޮށް، ރާއްޖޭގެ އެކި ކަންކޮޅުތަކުގައި ހުރި ރިސޯޓް ރަށްތައް ހިމެނުމަށް ފެށި މަޝްރޫއެކެވެ.