ބޭސްފަރުވާއަށް ގޮސް ހުރި އަމްރިތާ ހޮސްޕިޓަލުގެ ތެރެއިން ގެއްލިގެން ހޯދަމުންދަނީ ކ ތުލުސްދޫ، ޕަރިސްތާ، އުމުރުން 35 އަހަރުގެ މުހައްމަދު މަހްދީ ނަމަކަށް ކިޔާ މީހެކެވެ. އޭނާއަކީ ބައިޕޯލާ ޑިސްއޯޑާ އަށް ފަރުވާ ހޯދަމުންދާ މީހެކެވެ. 

އިއްޔެ ހެނދުނު ފެށިގެން ގެއްލިގެން އާއިލާއިން މަހްދީ ހޯދަން އާންމުންގެ އެހީތެރިކަމަށް އެދިފައިވާއިރު، މިއަދު އާއިލާއިން ބުނިގޮތުގައި އޭނާ އަދިވެސް ނުފެނެ އެވެ. 

އިންޑިއާ ފުލުހުންނާއި ދިވެހިން ފުލުހުންނާއި، ރާއްޖޭގެ ފޮރިން މިނިސްޓްރީ އަދި އިންޑިއަން ހައިކޮމިޝަނާއި ގުޅިގެން އާއިލާއިން ދަނީ އޭނާ ހޯދުމުގެ މަސައްކަތް ކުރަމުން ނެވެ.

އާއިލާއިން ބުނާގޮތުން ކޮޗިންއަށް ބޭސްފަރުވާއަށް ދިޔައީ ބައިޕޯލަ ޑިސްއޯޑަގެ މައްސަލަ ފަހަކަށް އައިސް ވަރަށް ބޮޑުވެ އެކަމަށް ފަރުވާކުރުމަށް އިންޑިއާއަށް ދިއުމަށް ޑޮކްޓަރު ލަފާދެއްވުމުން ނެވެ. 

ބަލީގެ ގޮތުން ކުއްލި ކުއްލިއަށް ގަދައަށް މަހްދީ ރުޅިއާދެ އެވެ. އިއްޔެ ހެނދުނު ޑޮކްޓަރަށް ދެއްކުމަށް އަމްރިތާ ހޮސްޕިޓަލަށް ދިއުމުންވެސް ކުއްލިއަކަށް ރުޅިގަދަވެ ހޮސްޕިޓަލުން ނިކުމެގެންދިޔައީ ކަމަށް އާއިލާއިން ބުނެ އެވެ.