މުޒާހަރާގެ ތެރޭގައި ހުއްޓާ ފުލުހުން އަނިޔާކުރި ކަމަށް ބުނާ ޝަހީދު އެދުވަހު ވަނީ އެތަނަށް ވެއްޓި އެމަޖެންސީގައި ހޮސްޕިޓަލަށް ގެންގޮސް ފަރުވާދީފަ އެވެ. އަދި ފަހުން އިތުރު ފަރުވާއަށް އޭނާ ލަންކާއަށް ފުރާފައި ވެއެވެ.
ޑޮކްޓަރުންނާއި ހަވާލާދީ އާއިލާއިން ބުނެފައިވާގޮތުގައި ޝަހީދުގެ މައިބަދައަށާއި ސިކުނޑިއަށް ވަނީ ގެއްލުންވެފަ އެވެ.
އިދިކޮޅު ޕީީޕީއެމް/ޕީއެންސީގެ ތަރުޖަމާން ހީނާ ވަލީދު މިއަދު "ސީއެންއެމް" އަށް ވިދާޅުވިގޮތުގައި އޭނާ ރާއްޖެ އައިސްފައިވަނީ މިދިޔަ ހުކުރު ދުވަހުގެ ރެއެވެ.
މުޒާހަރާގައި ބޮލަށާއި މައިބަދައަށް އަނިޔާވިއިރު، ޝާހިދަކީ މީގެ ކުރިންވެސް އޮޕަރޭޝަނެއް ކޮށްފައިވާ މީހެކެވެ.
މިމައްސަލާގައި ފުލުހުން މުޒާހަރާތަކުގައި އެކަށީގެންނުވާ ބާރުގެ ބޭނުންކޮށް މުޒާހަރާގެ ބައިވެރިންނާއި ނޫސްވެރިންނަށް އަނިޔާވާގޮތަށް އަމަލުތައް ބަހައްޓަމުންދާ ކަމަށް ބުނެ އިދިކޮޅު ފަރާތްތަކުން ވަނީ އެކަން ކުށްވެރިކޮށްފަ އެވެ.
މިމައްސަލާގައި މީޑިއާ ކައުންސިލުން ނެރުނު ބަޔާނުގައިވެސް، މުޒާހަރާ ރޫޅާލުމުގައި ފުލުހުންގެ ފަރާތުން ނޫސްވެރިންނަށް ބޮޑެތި އަނިޔާތަކެއް ލިބުނު ކަމަށާއި ބައެއް ނޫސްވެރިންގެ މަސައްކަތަށް ފުލުހުން ހުރަސްއަޅާފައިވާކަމަށް ބުނެ ކަންބޮޑުވުން ފާޅުކޮށްފައި ވެއެވެ.
މިމައްސަލާގައި ފުލުހުން ބުނެފައިވަނީ މުޒާހަރާގެ ތެރެއިން ނޫސްވެރިއަކަށް އަނިޔާވީ މުޒާހަރާގެ ބައިވެރިން، ނޫސްވެރިންނާއި ފުލުހުން ކޮއްޕާ، ފުލުހުންގެ ޝީލްޑްތަކުގައި ތަޅާކޮށްޕާ ހެދުމުގެ ތެރެއިން ވެއްޓިކަމަށެވެ.
