މި އެކްސިޑެންޓުގައި އަނިޔާވީ ގއ. ވިލިގިއްޔަށް އުފަން އުމުރުން 46 އަހަރުގެ ހަބީބު ހަސަން އަށެވެ. އޭނާގެ ބޭބެ ނާޒިމް ހަސަން މިއަދު ބުނިގޮތުގައި، ވެންޓިލޭޓަރުން ހަބީބު ނެގީ މިއަދު އެވެ. އަދި މިހާރު ހާލަތު އަންނަނީ ރަނގަޅު ވަމުން ނެވެ.
ހަބީބުގެ އާއިލާއިން މިހާރު މަސައްކަތް ކުރަމުންދަނީ އިތުރު ފަރުވާއަށް އޭނާ ރާއްޖެއިން ބޭރަށް ގެންދިއުމަށެވެ.
ނާޒިމް ބުނިގޮތުގައި އެކްސިޑެންޓުގައި ހަބީބުގެ އެތެރެހަށްޓަށް ވަނީ ވަރަށް ބޮޑަށް އަނިޔާވެފަ އެވެ.
ސައިކަލަކާއި ކާރެއްޖެހި ހިނގި މި އެކްސިޑެންޓުގައި ސީރިއަސް އަނިޔާތަކެއް ލިބުނު ހަބީބު ވަގުތުން އައިޖީއެމްއެޗަށް ގެންގޮސް އޭނާ އަށް އެމަޖެންސީގައި ފަރުވާދީފައިވާއިރު މިއަދާއި ހަމަޔަށް އޭނާ އޮތީ ވެންޓިލޭޓަރުގަ އެވެ.
މި އެކްސިޑެންޓުގައި ކާރަށާއި ސައިކަލަށްވެސް ބޮޑެތި ގެއްލުންތަކެއް ވަނީ ވެފައެވެ. އެގޮތުން ކާރުގެ ކުރީބައި އެއްކޮށް ފުޑުފުޑުވެފައިވާއިރު، ސައިކަލު އޮތީ މުޅިންހެން ފުޑުފުޑުވެ ހަލާކުވެފަ އެވެ. މި އެކްސިޑެންޓު ހިގަން މެދުވެރިވި ގޮތާއި ބެހޭގޮތުން ފުލުހުންގެ ފަރާތުން އަދި އެއްޗެއް ނުބުނެ އެވެ.
