މިމަޝްރޫއުގެ މަސައްކަތް ހިންގަމުން އަންނަ އިންޑިއާގެ އެފްކޯންސްގެ ފަރާތުން މަޝްރޫއުގައި އިސްކޮށް ހަރަކާތްތެރިވާ އޮޕަރޭޝަން ޑިރެކްޓަރު، އާރްވީއާރް ކިޝޯރު، މިދިޔަ އަހަރު ދިވެހި ނޫސްވެރިންނާއި ބައްދަލުކުރައްވާ ވިދާޅުވީ، 2023 ޖުލައި 23 އަށް މާލެ އާއި ވިލިމާލެ އާއި ދެމެދު ގުޅާލާ ނިމޭނެ ކަމަށެވެ.
އަދި އެދެމެދު އާންމު ދަތުރުތައް ކުރަން މިއަހަރުގެ އޮގަސްޓް 15 ގައި ފެށޭނެ ކަމަށްވެސް އޭރު އޭނާ ވިދާޅުވި އެވެ.
އެކަމަކު ބްރިޖު މަޝްރޫއުގެ މަސައްކަތްތައް ވިލަރެސްކުރުމަށް ޕްލޭނިން މިނިސްޓްރީގެ ދަށުން ބަލަހައްޓަމުންދާ ބްރިޖު އޮފީހުގެ ޕްރޮޖެކްޓް މެނޭޖަރު މުހައްމަދު ޖިނާން ”ސީއެންއެމް“ އަށް ވިދާޅުވީ، މަސައްކަތް މިހާރު ކުރިއަށްދާ ގޮތަށް ބަލާއިރު، މާލެ އާއި ވިލިމާލެ ގުޅާލެވޭނެ ކަމަށް ލަފާކުރަނީ މިއަހަރުގެ ޑިސެމްބަރަށް ކަމަށެވެ. އެތަން ބޭނުންކުރަން ފެށޭނެ ތާރީހެއް ވިދާޅެއް ނުވެ އެވެ.
ބްރިޖް މަސައްކަތައް އެފްކޯންސްއިން މީގެ ކުރިން ދިން ތާރީހުތައް
- މާލެ އާއި ވިލިމާލެ 2023 ޖުލައި 23 އަށް ނިމޭނެ
- އެ ދެމެދުގެ ދަތުރުތައް 2023 އޮގަސްޓް 15 އަށް ފެށޭނެ
- ގުޅިފަޅާއި ތިލަފުށި ވެސް 2023 ޑިސެމްބަރަށް ނިމޭނެ
- މުޅި ބްރިޖް މަޝްރޫއު ނޮވެމްބަރު 2024 އަށް ނިމޭނެ
ނަމަވެސް ޕްލޭނިން މިނިސްޓްރީން ސީއެންއެމް އަށް ދެއްވި ތާރީހުތަކުގައި ވާގޮތުން، އެފްކޯންސްއިން ބުނި އެ ތާރީހުތަކަށް މަސައްކަތްތައް ނިމޭނެ ކަމަކަށް ލަފައެއް ނުކުރެވެ އެވެ.
މިހާރު މަސައްކަތް ނިންމޭނެ ކަމަށް ލާފާކުރާ ތާރީހުތައް
- މާލެ އާއި ވިލިމާލޭ ގުޅާާލާ ނިމޭނީ ޑިސެމްބަރަށް
- ގުޅީފަޅާއި ތިލަފުށި ގުޅާލާ ނިމޭނެ ކަމަށް ލަފާކުރަނީ 2024 ގެ މެއި ހިސާބުގަ
- މުޅި ބްރިޖު މަޝްރޫއު ނިމޭނެ ކަމަށް ލަފާކުރެވެނީ 2024 ޑިސެމްބަރަށް
މި ތާރީހުތަކަށް މަސައްކަތް ނިންމުމަށް ގިނަ މަސައްކަތްތަކެއް ދަނީ ކުރަމުން ނެވެ. އެގޮތުން މިހާރު މާލޭގެ އެއްގަމުގައި ޖަހާ އަށް ތަނބުގެ މަސައްކަތް ނިމިފައި ވާއިރު، ކަނޑުގައި ޖަހާ ތަބުތަކުގެ މަސައްކަތް ވަނީ ފަށާފަ އެވެ. މީގެ އިތުރުން ވިލިމާލޭ ކޮޅުން ހިއްކަން ޖެހޭ ސަރަހައްދުގެ މަސައްކަތް މިމަސްތެރޭ ފެށޭނެ އެެވެ.
ތިލަމާލެ ބުރިޖަކީ ޖުމުލަ 500 މިލިއަން ޑޮލަރު (7.7 ބިލިއަން ރުފިޔާ)ގެ މަޝްރޫއެކެވެ. އެ މަޝްރޫއަށް ބޭނުންވާ މާލީ އެހީ ހަމަޖައްސާފައި ވަނީ އިންޑިއާގެ ހިލޭ އެހީގެ ދަށުންނާއި އެ ގައުމުގެ އެގްޒިމް ބޭންކުގެ ލައިން އޮފް ކްރެޑިޓުގެ ދަށުންނެވެ.
