ރައްޔިތުންގެ މަޖިލީހުގެ މިއަދުގެ ޖަލްސާގެ ވަޒީރުންނާއި ސުވާލުކުރުމުގެ ވަގުތުގައި، ކުށްކުރާ ފުލުހުންނާއިމެދު ފިޔަވަޅު އެޅުމާއި ގުޅޭގޮތުން މެމްބަރަކު ކުރެއްވި ސުވާލެއްގެ ޖަވާބުގައި ހޯމް މިނިސްޓަރު އިމްރާން އަބްދުﷲ ވިދާޅުވީ އެފަދަ ފުލުހުންނާއިމެދު ފިޔަވަޅު އަޅަމުން ގެންދާކަމަށެވެ.
އެގޮތުން ބައެއް ފުލުހުން ވަޒީފާއިން ވަކިކޮށް، ބައެއް ފުލުހުން ޑީމޯޓް ކުރުމުގެ އިތުރުން ބައެއް ފުލުހުން އެހެން ޔުނިޓްތަކަށް ބަދަލުކޮށްފައިވާކަމަށްވެސް އިމްރާން ވިދާޅުވިއެވެ.
މިނިސްޓަރު ވިދާޅުވީ އެމަނިކުފާނުގެ އަތުން ސޮއިކުރައްވާ އެތައް ފުލުހުންނެއް މިހާރުވެސް ވަޒީފާއިން ވަކިކޮށްފައިވާ ކަމަށެވެ. ނަމަވެސް ފިޔަވަޅު އެޅި ފުލުހުންގެ އަދަދެއް އިމްރާން ވިދާޅެއް ނުވެއެވެ.
އިމްރާން ވިދާޅުވީ ފުލުހުންގެ ތެރޭގައި ގާނޫނާއި ހިލާފުވާ އަދި ކުށްކުރާ މީހުން ތިބިތޯ ބެލުމަކީ އެންމެ ސީރިއަސްކޮށް އިސްކަންދެއްވާ އެއް ކަންތައްކަމަށާއި އެފަދަ ކަމެއް ފާހަގަވެއްޖެ ނަމަ ފިޔަވަޅު ނާޅާ ދޫކޮށް ނުލާކަމަށެވެ.