ހުޅުމާލެ ބާ އިންޖީނު ގޭގައި ހެދި އެ ޕަވާޕްލާންޓަކީ 20.2 މެގަވޮޓު ކެޕޭސިޓީގެ ޕަވާޕްލާންޓެއް ކަމަށް ސްޓެލްކޯއިން ބުނެއެވެ.

ކުއްލި ހާލަތްތަކުގައި ބޭނުން ކުރުމަށް ހާއްސަކޮށްގެން އެ ކުންފުނިން ހެދި އިންޖީނުގޭގެ ސަބަބުން މައްސަލައެއް ދިމާވި ނަމަވެސް ހުއްޓުމެއް ނެތި ކަރަންޓު ފޯރުކޮށްދެވޭނެ ކަމަށް ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވިއެވެ.

ސްޓެލްކޯގެ މެނޭޖިން ޑިރެކްޓަރުގެ ސީދާ ބެއްލެވުމުގެ ދަށުން ކުރިއަށް ގެންދިޔަ މި ޕްރޮޖެކްޓުގެ މަސައްްކަތް އެ ކުންފުނިން ކޮށް ނިންމީ އެއް މަސް ދުވަހުގެ ތެރޭގައި ކަމަށް ސްޓެލްކޯއިން ބުނެއެވެ. ސްޓެލްކޯއިން ބުނެފައިވާ ގޮތުގައި މިއީ އެ ކުންފުނީގެ ތާރީހުގައި މިހާތަނަށް އެންމެ ކުރު މުއްދަތެއްގެ ތެރޭގައި ގިނަ އިންޖީނުތަކެއް ކޮމިޝަން ކުރި ޕްރޮޖެކްޓް ކަމަށެވެ.

ސްޓެލްކޯއިން ހުޅުމާލޭގައި ގާއިމުކުރި އިމަޖެންސީ ޕަވާޕްލާންޓު - ފޮޓޯ:ސްޓެލްކޯ

އެމަޖެންސީ ބެކަޕް ޕަވާޕްލާންޓުގެ ތެރޭގައި ހުންނާނީ 10 އިންޖީނު ކަމަށް ޝަރީފް ވިދާޅުވިއެވެ. ޝަރީފް ވިދާޅުވެފައިވަނީ އެ އިންޖީނުތަކުގެ އިތުރަށް އަލަށް ގެނައި ތިން އިންޖީނު އިންސްޓޯލްކުރުމުގެ މަސައްްކަތް ކުރަމުންދާ ކަމަށެވެ. އޭގެ އިތުރުން ކޮންޓޭނަރައިޒްޑް ހަތަރު އިންޖީނުވެސް އެތަނުގައި ހުންނާނެ ކަމަށް ޝަރީފް ވިދާޅުވިއެވެ.

ސްޓެލްކޯއިން ބުނީ މި އެމަޖެންސީ ބެކަޕް ޕަވާޕްލާންޓާ އެކު މާލެ ސަރަހައްދުގެ ޕަވާ ސެކިއުރިޓީ އިތުރަށް ކަށަވަރު ކުރެވިގެންދާނެ ކަމަށެވެ.