ދިރާގުން ބުނީ އީދު ނަމާދަށް ފަހު 'ދިރާގު އީދު ބޮނޑިބަތް' ހަރަކާތް މުޅި ރާއްޖޭގެ އެކި އަތޮޅުތަކުގައި ކުރިއަށް ގެންގޮސްފައިވާ ކަމަށެވެ. އެގޮތުން އެ ކުންފުނިން ވަނީ މާލެ ސަރަހައްދު، ފުވައްމުލައް ސިޓީ، އައްޑޫ ސިޓީ، ކުޅުދުއްފުށި ސިޓީ، ގދ. ތިނަދޫ، ބ. އޭދަފުށި އަދި އދ. ދަނގެތީގައި 'ދިރާގު އީދު ބޮނޑިބަތް' ބަހާފައި ކަމަށް ދިރާގުން ބުނެއެވެ. ދިރާގުން ބުނެފައިވަނީ މާލެ ސަރަހައްދުގައި މި ހަރަކާތް ކުރިއަށް ގެންގޮސްފައިވަނީ ސަލްޓަން ޕާކު ކުރިމަތީގައި މާލެ ސިޓީ ކައުންސިލާ ގުޅިގެން ކަމަށާއި ހުޅުމާލެ ސިންތެޓިކް ޓްރެކްގައި ބޭއްވި ހަރަކާތް ކުރިއަށް ގެންދިޔައީ އާބަންކޯ އާ ގުޅިގެން ކަމަށެވެ.
ދިރާގުން ބުނި ގޮތުގައި އެ ކުންފުނިން ވަނީ އެކި ރަށު އަދި ސިޓީ ކައުންސިލްތަކާއި ޒުވާނުންގެ ޖަމިއްޔާތަކާ ގުޅިގެން ތަފާތު އީދު ކުޅިވަރުތަކަށް އެއްބާރުލުންދީފައި ކަމުގައެވެ.
ބޮޑު އީދު ފާހަގަކުރުމަށް ދިރާގުން ކުރިއަށް ގެންދިޔަ އީދު ބޮނޑިބަތަށް ރާއްޖޭގެ އެކި ކަންކޮޅުތަކުން އާންމުންގެ ބޮޑު ތަރުހީބެއް ވަނީ ލިބިފައި - ފޮޓޯ:ދިރާގު
ދިރާގުން އަބަދުވެސް މަސައްކަތް ކުރަމުން ދަނީ އާންމުންނަށް ތަފާތު ގިނަ އިޖުތިމާއީ ހަރަކާތްތައް ގެނެސްދީ އެ ފަރާތްތަކުގެ ދިރިއުޅުން އިތުރަށް ފުރިހަމަކޮށްދީ މުއްސަނދިކޮށްދިނުމަށް ކަމަށް އެ ކުންފުނިން ބުނެއެވެ.
