ފުލުހުން މިކަން ހާމަކުރީ އައްޑޫގައި ހުންނަ ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓްގައި މި ސެންޓަރު ހުޅުވާފައިވަނީ "ސެންޓަ އޮފް އެކްސަލެންސް ފޯ ޕަބްލިކް ސޭފްޓީ"ގެ ނަމުގައި ސެންޓަރެއް ހުޅުވުމަށްފަހުއެވެ.
މި ސެންޓަރަށް ޔޫއޭއީގެ "ޕްރީސައިޓް" ކުންފުނިން ވަރަށް ބޮޑު އެހީތެރިކަމެއް ފޯރުކޮށްދީފައިވެއެވެ. މިކުންފުންޏަކީ އާޓިފިޝަލް އިންޓެލިޖެންސް އަދި ބިގް ޑާޓާ އެނަލިޓިކްސްގެ ދާއިރާގައި ފާހަގަކޮށްލެވޭ ކާމިޔާބީތަކެއް ހޯދާފައިވާ ކުންފުންޏެއްކަމަށް ފުލުހުން ބުންޏެވެ.
ފުލުހުން ބުނީ މި ސެންޓަރުގައި ގާއިމުކޮށްފައިވާ އެކި ޕްލެޓްފޯމްތަކަކީ އާޓިފިޝަލް އިންޓެލިޖެންސް އަދި މެޝިން ލާނިން ގާބިލިއްޔަތުތައް ބޭނުންކޮށްގެން، ދިވެހި މުޖުތަމައަކީ ކުށްމަދު މުޖުތަމައަކަށް ހެދުމަށް ބޭނުންކުރެވޭނޭ ވަސީލަތްތައް ހުރި ތަނެއް ކަމަށެވެ.
ސެންޓަރު ހުޅުވާދެއްވުމަށްފަހު ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ މިފަދަ މަސައްކަތްތަކެއްގެ ތެރެއިން ފުލުހުން ހާސިލުކުރަން ބޭނުންވާ އެންމެ މުހިއްމު ކަމަކީ ދިވެހިރާއްޖެއަކީ ދުނިޔޭގެ ނިސްބަތުން އެންމެ އަމާން، ރައްކާތެރި ގައުމުތަކުގެ ތެރޭގައި ހިމެނޭ ގައުމަކަށް ހެދުން ކަމަށެވެ.
އޭއި ގެ ސަބަބުން ދުނިޔޭގެ ގިނަ މަސައްކަތްތަކަށް ބޮޑު ލުއިތަކަކާއި ކުރިއެރުންތަކެއް ހޯދުމުގެ އިންގިލާބެއް މިހާރު ދުނިޔޭގައި ވަނީ ފެށިފައެވެ. ރާއްޖޭގައި އޭއީ މެދުވެރިކޮށް ކުށް މަދުކުރުމުގެ މަސައްކަތް ފެށުމުން، ރާއްޖެއަށް އިތުރު ހަމަޖެހުންތަކެއް ލިބިގެންދާނެކަމަށް ބެލެވެއެވެ.
