އެމްއެފްޑީއޭ އިން ނެރެފައިވާ އެލާޓެއްްގައި ބުނެފައިވަނީ، "ޑެފިޓެލިއޯ" ނަމަކަށް ކިޔާ ބޭހެއްގެ ތަޣައްޔަރުވެފައިވާ ބެޗްތަކެއް ޔޫރަޕްގެ ތުރުކީ އާއި، ދެކުނު އިރުމަތީ އޭޝިއާގެ އިންޑިއާގައި ދައުރުވަމުންދާ ކަމަށް ބުނެ ވޯލްޑް ހެލްތް އޮގަނައިޒޭޝަން (ޑަބްލިއު އެޗް އޯ) ގެ އެލާޓް އަކުން އަންގާފައިވާތީވެ، އެކަމަށް ސަމާލުވުމަށް އަންގާ ކަމަށެވެ.
މިީގެ އިތުރުން މީގެ ކުރިން ވެސް މި ބޭހުގެ ތަޣައްޔަރުވެފައިވާ ބެޗެއް ޔުނައިޓެޑް އެރެބް އެމިރޭޓްސް އިންނާއި ކިރިގިސްތާނުން ފެނިފައިވާތީވެ، ޑަބްލިއު އެޗް އޯ އިން އެލާޓެއް ނެރެފައިވާ ކަމަށް ވެސް އެމްއެފްޑީއޭ އިން ބުނެފައިވެއެވެ.
މި ބޭހަކީ ރާއްޖެއަށް އިމްޕޯޓްކުރުމާއި ވިއްކުމަށް ހުއްދަކުރާ ބޭހުގެ ތެރޭގައި ހިމެނޭ ބޭހެއް ނޫން ނަމަވެސް ރާއްޖެއިން ބޭރުން ބޭސްފަރުވާ ކުރާ ފަރާތްތަކުންނާއި ނުވަތަ އަމިއްލަގޮތުން ބޭސް ސިޓީއަށް ބޭސް އެތެރެކޮށް ބޭނުންކުރާނަމަ، އެމްއެފްޑީއޭ އިން އާއްމުކޮށްފައިވާ ބެޗް ނަމްބަރަށް ސަމާލުވުމަށް އެމްއެފްޑީއޭ އިން ބުނެފައިވެއެވެ. އަދި ރައްކާތެރިކަމުގެ ފިޔަވަޅެއްގެ ގޮތުން ބޭސް ސިޓީއަށް ރާއްޖެއަށް އިމްޕޯޓް ކުރާ ބޭސް ހާއްސަ ސަމާލުކަމެއް ދީގެން ޕޯޓްތަކުގައި ބަލައިފާސްކުރާނެ ކަމަށް ވެސް ބުނެފައިވެއެވެ.