މިއަދު އެމްއެމްސީން ނެރުނު ބަޔާނުގަ ބުނީ، ރިޔާސީ އިންތިހާބު 2023 އާއި ގުޅޭ ހަބަރުތައް ގެނެސްދިނުމައި، ކެމްޕެއިން ކުރުން މަނާ ގަޑީގައި އިންތިހާބުތަކާބެހޭ އާންމު ގާނޫނު ގެ 44 ވަނަ މާއްދާ އާއި ހިލާފަށް އެއްވެސް މީޑިއާއަކުން އަމަލު ނުކުރުމަށް މީޑިއާތަކަށް އިލްތިމާސްކުރާކަމަށެވެ.
އެކައުންސިލުން ބުނީ ރިޔާސީ އިންތިހާބު 2023 ގެ ދެ ވަނަ ބުރުގައި، ކެމްޕެއިން ކުރުން މަނާ ގަޑިކަމުގައިވާ، 29 ސެޕްޓެމްބަރު 2023 ވާ ހުކުރު ދުވަހުގެ ހަވީރު 6:00 ން ފެށިގެން 01 އޮކްޓޫބަރު 2023 ވާ އާދީއްތަ ދުވަހުގެ ހެނދުނު 6:00 އާ ދެމެދު އިންތިހާބުތަކާބެހޭ އާންމު ގާނޫނުގެ 44 ވަނަ މާއްދާ އާއި ހިލާފަށް އެއްވެސް ކޮންޓެންޓެއް ގެނެސްދޭތޯ، އެ ކައުންސިލް އިން މޮނީޓަރކުރަމުންދާނެކަމަށެވެ.
މީޑިއާތަކުން މިފަދައިން އަމަލުކުރާކަން އެއްވެސް ފަރާތަކަށް ފާހަގަވާނަމަ އެ ކައުންސިލްގެ ހޮޓްލައިން ނަންބަރު 7967919 އަށް ރިޕޯޓުކޮށްދެއްވުން އެދޭކަމަށްވެސް ކައުންސިލުން ވަނީ ބުނެފައެވެ.
