މުއިއްޒު މިހެން ވިދާޅުވީ މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއައި) ގެ ފަރާތުން ބޭއްވި ބައްދަލުވުމެއްގައި ވާހަކަދައްކަވަމުންނެވެ.
ރާއްޖޭގެ އިގުތިސޯދު މިހާރު އޮތީ ދިވެހިންގެ އަތުން ބީވެގެން ދިއުމުގެ މަގުމަތީގައިކަން ފާހަގަކުރައްވާ މުއިއްޒު ވިދާޅުވެފައިވަނީ އިގުތިސޯދު އަނބުރާ ހޯދަން ގިނަ މަސައްކަތްތަކެއް ކުރަން ޖެހިފައިވާ ކަމަށެވެ.
ރާއްޖޭގެ ވިޔަފާރިތައް ކުރިއެެރުވުމަށް އެކި ދާއިރާތަކުން ދިވެހިވަންތަކަމާއި ދިވެހިންގެ އަމިއްލަވަންތަކަން އިސްކުރަން ޖެހޭ ކަމަށް މުއިއްޒު ވިދާޅުވި އެވެ. މުއިއްޒު ވިދާޅުވި ގޮތުގައި އެކަން ހާސިލުކުރަން ސިނާއަތްތައް ކުރިއެރުވުމުގައި އެމަނިކުފާނުގެ ސަރުކާރުގެ ސިޔާސަތަކަށް ވާނީ ދިވެހިންނަށް އިސްކަންދިނުން ކަމުގަ އެވެ.
ހަގީގީ މާނައެއްގައި ރާއްޖޭގެ މިނިވަންކަން އަނބުރާ އިއާދަކޮށް، އަމިއްލަ ފައިމައްޗަށް ތެދުވެފައިވާ މުސްތަގިއްލު ގައުމަކަށް ހަދަން ބޭނުންވާ ނަމަ، ހުރިހާ ދާއިރާއަކުން ދިވެހިންނާއި ދިވެހި ވިޔަފާރިތަކަށް އިސްކަންދިނުމަކީ ކަންކަން ބައްޓަންވެފައި އޮންނަން ޖެހޭނެ ގޮތް ކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ އެ މައްސަލައަށް ހައްލެއް ހޯދޭނީ ވިޔަފާރިވެރިންނާއި މަސައްކަތްތެރިން ވިޔަފާރީގެ ދާއިރާގެ ބޭރުން ގައުމާ މެދު ފުޅާކޮށް ވިސްނައިގެން ކަމަށެވެ. އަދި ގައުމު ބިނާކުރުމުގެ މަސައްކަތުގައި އެއިން ކޮންމެ ފަރާތަކަށްވެސް ވެވޭނެ ހިއްސާ އާ މެދު ފިކުރުކޮށް، އެފަދައިން ހިއްސާވާ ފަރާތްތަކަށް ވެގެން ކަމަށް އެމަނިކުފާނު ވިދާޅުވި އެވެ. މުއިއްޒު ފާހަގަކުރެއްވި ގޮތުގައި މިއަދު އެފަރާތެއްގެ ވަރުން ރާއްޖޭގެ އަމިއްލަވަންތަކަން ހޯދުމަށް މަސައްކަތް ނުކޮށްފި ނަމަ އެކަން އަނބުރާ ނުހޯދޭނެ ކަމުގަ އެވެ.