މިގޮތުން އައު ސަރުކާރުން ވަނީ 458 ޕްރޮޖެކްޓެއްގެ ފަންޑު ހޯދުމަށް ބަޖެޓުގައި ހިމެނުމަށް ހުށަހަޅާފައެވެ. މުއިއްޒުގެ ސަރުކާރުން މުޅިން އަލަށް 314 މަޝްރޫއެއް ފަށާއިރު، ބަޖެޓަށް ހުށަހެޅި 144 މަޝްރޫއު އަކީ މިހާރު ވެސް ހިންގަމުން އަންނަ މަޝްރޫއުތަކެކެވެ.
މުއިއްޒުގެ ސަރުކާރުގެ އެދުމަށް ބަޖެޓުގައި ހިމަނާފައިވާ ފައިސާގެ ތެރެއިން އެންމެ ބޮޑު ހަރަދެއް ކުރަން ނިންމާފައިވަނީ ފުށިދިއްގަރު ފަޅު ހިއްކުމަށެވެ. އެ ފާޅު ހިއްކުމުގެ މަޝްރޫއަށް އަންނަ 2024 ވަނަ އަހަރަރު 400 މިލިއަން ރުފިޔާ ވަނީ ބަޖެޓުކޮށްފައެވެ.
އެގޮތުން އެ މަޝްރޫއުގެ ދަށުން ފައިސާ ހަރަދުކުރަން ބަޖެޓުގައި ވަނީ ތިން އަހަރަކަށް ބަހާލުމަށް ހިމަނާފައެވެ. އެއީ އަންނަ 2024 ވަނަ އަހަރަށް 400 މިލިއަން ރުފިޔާ، 2025 ވަނަ އަހަރަށް 600 މިލިއަން ރުފިޔާ އަދި 2026 ވަނަ އަހަރަށް 350 މިލިއަން ރުފިޔާއެވެ.
ޑރ، މުއިއްޒު ހުޅުމާލޭ ރައްޔިތުންނާ ބައްދަލުކުރައްވައި ވާހަކަ ދައްކަވަމުން ވިދާޅުވެފައިވަނީ، އެމަނިކުފާނުގެ ސަރުކާރެއްގައި އެންމެ އިސްކަމެއް ދެއްވާނީ ދިވެހި ރައްޔިތުންނަށް ބޯހިޔާވަހިކަން ފޯރުކޮށްދެއްވަންކަމަށެވެ. އެގޮތުން ފުށިދިއްގަރު ފަޅު ހިއްކާނީ މޫސިމީ ކާރިސާތަކުން ވެސް ރައްކާތެރިކޮށް އުސްކޮށްކަމަށް ވިދާޅުވިއެވެ. އަދި އެމަނިކުފާނުގެ ވެރިކަމެއްގައި އެންމެ އިސްކަމެއް ދެއްވާނީ ވެސް ފުށި ދިއްގަރު ފަޅު ހިއްކުމަށް ކަމަށް ވެސް މުއިއްޒު ވިދާޅުވިއެވެ.
