ސީނިއާ މިނިސްޓަރުގެ ފެންވަރުގައި އަބްދުއްރަހީމް، ސްޕެޝަލް އެޑްވައިޒަ ޓު ދަ ޕްރެޒިޑެންޓްގެ މަގާމުގެ ފަތްކޮޅު ހަވާލު ކޮށްދެއްވީ ރައީސުލްޖުމްހޫރިއްޔާގެ އޮފީހުގައި މިހާރު ކުރިއަށްދާ ރަސްމިއްޔާތެއްގައި ރައީސް ޑރ. މުއިއްޒެވެ.
ރައީސް އޮފީހުގައި ދެން އޮތީ ރައީސް ޑރ. މުއިއްޒުގެ ކެބިނެޓް އިއުލާން ކުރެއްވުން ކަމަށްވާއިރު، އެމަނިކުފާނު މީގެކުރިން ވިދާޅުވެފައި ވަނީ 22 ބޭފުޅަކު ކެބިނެޓަށް އައްޔަން ކުރައްވާނެ ކަމަށެވެ.
ރައީސް ޑރ. މުއިއްޒުގެ ސްޕެޝަލް އެޑްވައިޒަރަކަށް އައްޔަން ކުރެއްވި އަބްދުއްރަހީމް ވަނީ މި އަހަރުގެ ރިޔާސީ ކެމްޕެއިނުގައި އެމަނިކުފާނާ އެކު ހުރިހާ ރަށަކަށް ދަތުރުކުރައްވާފަ އެވެ. އިންތިހާބު ޑރ. މުއިއްޒަށް ކާމިޔާބު ކޮށްދެއްވުމުގައި ޕީޕީއެމް/ޕީއެންސީ ކޯލިޝަނުން އެންމެ އިސް ފަރާތެއްގެ ހައިސިއްޔަތުން ހަރަކާތްތެރިވެ ވަޑައިގެންފައި ވަނީ އަބްދުއްރަހީމެވެ.
ރިޔާސީ އިންތިހާބުގައި ލިބުނު ކާމިޔާބީ އާއެކު، ޑިރެކްޓަ ޖެނެރަލް އޮފް ޓްރާންސިޝަންގެ މަގާމަށް ޑރ. މުއިއްޒު އައްޔަން ކުރެއްވީވެސް އަބްދުއްރަހީމެވެ.