ޝަޖަންއަކީ ރާއްޖޭގެ އެންމެ މަތީ ފެންވަރުގެ އެތްލީޓެއްގެ އިތުރުން، ސްޕޯރޓްސް އެތިކްސް އެންޑް އިންޓަގްރެޓީ ދާއިރާއިން ރާއްޖޭން ބޭރުން ތައުލީމް ހާސިލް ކުރައްވައިގެން ހުންނެވި ބޭފުޅެކެވެ.
މޮޅު ފެތުންތެރިޔާ، ޝަޖަން ވަނީ ލަންޑަން 2012 އޮލިމްޕިކް ގޭމްސް އަދި ރިއޯ 2016 އޮލިމްޕިކް ގޭމްސްގައި ދިވެހިރާއްޖެ ތަމްސީލުކޮށްފައެވެ. އަދި، ސިންގަޕޯރ 2010 ޔޫތު އޮލިމްޕިކް ގޭމްސްގައިވެސް ޝަޖަން ވަނީ ދިވެހިރާއްޖެ ތަމްސީލުކޮށްފައެވެ.
2019 ވަނަ އަހަރުގެ ސައުތު އޭޝިއަން ގޭމްސްގައި ދިވެހިރާއްޖެއަށް ޝަޖަން ހޯދައިދިން ލޯ މެޑަލްއަކީ ދިވެހި ތާރީޚުގައި، ފެތުމުގެ ދާއިރާއިން ދިވެހިރާއްޖެއަށް ލިބުނު ފުރަތަމަ އިންޑިވިޖުއަލް މެޑަލްއެވެ. މީގެ އިތުރުން ޝަޖަން ވަނީ، 2016 ވަނަ އަހަރު ބޭއްވުނު ސައުތު އޭޝިއަން އެކުއަޓިކް ޗެމްޕިއަންޝިޕްސްގައި އިތުރު 2 ލޯ މެޑަލް ދިވެހިރާއްޖެއަށް ހޯދައިދީފައެވެ.
މެލޭޝިއާގެ ލިމްކޮކްވިންގ ޔުނިވަރސިޓީ އޮފް ކްރިއޭޓިވް ޓެކްނޮލޮޖީ އިން ބެޗްލަރ އިން ސްޕޯރޓްސް މެނޭޖްމަންޓުން ޑިގްރީ ހާސިލް ކުރައްވާފައިވާ ޝަޖަން، ބެލްޖިއަމްގައި މާސްޓަސް ފުރިހަމަ ކުރެއްވީ، ސްޕޯރޓްސް އެތިކްސް އެންޑް އިންޓަގްރެޓީންނެވެ.