ފުލުހުން ބުނީ މިދިޔަ ހުކުރު ދުވަހާއި އާދިއްތަ ދުވަހު އައްޑޫގައި ހިނގި މާރާމާރީގެ ދެ މައްސަލައިގައި ޖުމްލަ 11 މީހުން ހައްޔަރު ކޮށްފައިވާ ކަމަށެވެ. އަދި އޭގެތެރެއިން އެކަކު ދޫކޮށްލީ އިތުރަށް އޭނާ ބަންދުގައި ބެހެއްޓުމަށް ނުފެންނާތީ ކަމުގައި ފުލުހުން ވަނީ ބުނެފަ އެވެ.

މި ދެ މާރާމާރީގައި ދެ މީހަކަށް ވަރަށް ބޮޑު ޒަހަމްތަކެއް ވަނީ ލިބިފަ އެވެ. މާރާމާރީތަކުގައި އަނިޔާވެ، ހާލު ސީރިއަސްވެފައި ވަނީ އުމުރުން 20 އަހަރުގެ ފިރިހެނަކަށާއި 30 އަހަރުގެ ފިރިހެނަކަށެވެ. އެ ދެ މީހުން މާލޭ ގެނެސް އައިޖީއެމްއެޗްގައި އަންނަނީ ފަރުވާ ދެމުންނެވެ.

އައްޑޫގައި ހިންގި ގޭންގް މާރާމާރީތަކަކާ ގުޅިގެން ފުލުހުން ވަނީ ސަލާމަތީ ފިޔަވަޅުތައް ވަރުގަދަކޮށްފަ އެވެ. އެ ސިޓީގައި މާރާމާރީ ހިންގުމަށް ތައްޔާރުކޮށްފައި ހުރި ކަމަށް ބެލެވޭ ތޫނު ހަތިޔާރާއި އާލާތްތަކެއްވެސް ފުލުހުން ވަނީ ހޯދާފަ އެވެ.