މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި ވާހަކަ ދައްކަވަމުން ސިވިލް ސާވިސް ކޮމިޝަންގެ ރައީސް މުހައްމަދު ނާސިހް ވިދާޅުވީ ސާޖިދާ އެދިވަޑައިގަތީ ދާއިމީ ވަޒީފާގައި ހުންނަވައިގެން ލުއިތަކެއް ދެއްވުމަށްކަމަށެއެވެ.
ނާސިހް ވިދާޅުވީ އެގޮތަށް ލުއިތަކެއް ދިނުމަށް ގަވައިދު ތަން ނުދޭތީ އެކަމަށް ހަމައެކަނި އޮތް ގޮތަކީ ވަޒީފާއިން މުސާރަ ނުލިބޭ ގޮތަށް، ކޮންޓްރެކްޓް އުސޫލުން ހިދުމަތް ދިނުން ކަމަށްވާތީ އެގޮތައް ލަފާ ދެއްވާފަވާކަމަށެވެ.
ގާނޫނީގޮތުން އެކަން އޮތްގޮތް ބެލި އިރު ރައީސްގެ އަނބިކަނބަލުންނަށް ސިވިލް ސާވިސްގެ ވަޒީފާގައި މަސައްކަތް ނުކުރެވޭނެ ކަމަށް ރާއްޖޭގައި މިހާރު ހުރި އެއްވެސް ގާނޫނަކުން މަނާ ނުކުރާކަމަށާއި، އެގޮތުން ކޮންޓްރެކްޓް އުސޫލުން ހިދުމަތް ކުރެއްވުމަށް ސާޖިދާ ނިންމެވީ އަދާކުރައްވަމުން ގެންދެވި ވަޒީފާ އެގޮތުގައި ކުރިއަށްގެންދެވުމަށް ދަތިތަކެއް ހުރުމުން ކަމަށްވެސް ވިދާޅުވިއެވެ.
ސާޖިދާއެކު ހަދާފައިވާ ކޮންޓްރެކްޓުގައިވާ ގޮތުން މަހަކު 40 ގަޑިއިރު ހިދުމަތްކުރަން ޖެހޭއިރު އުޖޫރައެއްގޮތުގައި ގަޑިއިރަކަށް 75 ރުފިޔާގެ އުޖޫރައެއް ކަނޑައަޅާފަވެއެވެ. އެހެންކަމުން ސާޖިދާއަށް މި ކޮންޓްރެކްޓް ދަށުން މަސައްކަތްކޮށްގެން ލިބޭނީ މަހަކު 3000 ރުފިޔާކަމަށް ނާސިހް ވިދާޅުވި އެވެ.
އެއީ ރައީސް އަނބިކަނބަލުންނަށް ވީތީ ހެދި ހާއްސަ އުސޫލެއް ނޫންކަމަށާއި މީގެ ކުރިންވެސް އެ އުސޫލުގެ ދަށުން މީގެ ކުރިންވެސް ގިނަ މިނިސްޓްރީތަކަށް އެކި މީހުން ހިދުމަތްކޮށްފައިވާކަމަށާއި، މިހާރުވެސް ހިދުމަތް ކުރައްވަމުން ގެންދާކަމަށެވެ.
