އެމްއެމްސީން މިއަދު އެކްސްގައި ކުރި ޕޯސްޓެއްގައި އެ ކައުންސިލުން ބުނީ ރަޖިސްޓްރީނުކޮށް ހިންގާ ނޫސް މަޖައްލާތަކާއި ވެބްސައިޓުތަކަކީ ވެސް "މީޑިއާ" ކަމަށް މީޑިއާ ކައުންސިލުގެ ގާނޫނުގެ 36 ވަނަ މާއްދާގައި ބަޔާންކުރާ ކަމަށެވެ. އަދި ބްލޮކްކުރި ދެ ވެބްސައިޓުގެ ކޮންޓެންޓާ ގުޅޭ އެއްވެސް މައްސަލައެއް މިހާތަނަށް އެ ކައުންސިލަށް ހުށަހަޅާފައި ނުވާ ކަމަށް އެމްއެމްސީން ބުނެފައިވެ އެވެ.
އެ މައްސަލާގައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި އެޑިޓާސް ގިލްޑް މޯލްޑިވްސްއިން ވެސް ވަނީ ކަންބޮޑުވުން ފާޅުކޮށްފަ އެވެ.
އެޑިޓާސް ގިލްޑުން މިއަދު ނެރުނު ނޫސްބަޔާނެއްގައި ބުނީ ރާއްޖޭގައި މިނިވަންކަމާ އެކު ފިކުރު ކުރުމާއި އިސްލާމްދީނުގެ އަސްލަކާ ހިލާފު ނުވާ ގޮތުގެ މަތީން ދުލާއި ގަލަމުން ހިޔާލުފާޅުކުރުމުގެ މިނިވަންކަމަކީ ގާނޫނު އަސާސީގެ 27 ވަނަ މާއްދާއިން ދިވެހި ރައްޔިތުންނަށް ކަށަވަރު ކޮށްދީފައިވާ އަސާސީ ހައްގެއް ކަމަށެވެ.
އެޑިޓާސް ގިލްޑުން ބުނެފައި ވަނީ މޯލްޑިވްސް މީޑިއާ ކައުންސިލުގެ ގާނޫނުން "މީޑިއާ" ކަމަށް ބަލައިގެންފައިވާ ހަމަތަކުގެ ތެރޭގައި ވެސް ރަޖިސްޓްރީ ނުކޮށް ހިންގާ ނޫސް މަޖައްލާތަކަކީވެސް ހަބަރާއި މައުލޫމާތު ފެތުރުމަށް މީޑިއާ ކަމަށް ބަލައިގެންފައިވާ ކަމަށެވެ.
