އޮންލައިން ނޫސްތައް ސަރުކާރުން ބްލޮކްކުރުން ހުއްޓާލުމަށް ގޮވާލާ ރައްޔިތުންގެ މަޖިލީހަށް ހުށަހަޅާފައިވާ ކުއްލި މައްސަލައިގައި ބަހުސް ކުރައްވަމުން ޝާހިދު ވިދާޅުވީ، ނޫސްތައް ބްލޮކްކުރުމަށްފަހު ވަކިވަކި ފަރުދުންނާ ސަރުކާރުން ކުރިމަތިލާން ފެށުމުގެ ކުރިން މަޖިލީހުގެ ތެރެއިން ފިޔަވަޅުތަކެއް އަޅަންޖެހޭކަމަށެވެ.
މުހައްމަދު ޝާހިދު ވިދާޅުވީ ނޫސްވެރިކަމުގެ ސަބަބުން ސަރުކާރެއް "ބަރަހަނާ" ވެސް ވެދާނެކަމަށެވެ.
އޭނާ ވިދާޅުވީ ނޫސްވެރިކަމުގެ މިނިވަންކަމަކީ ކޮންމެ އިންސާނަކަށްވެސް އިސްލާމް ދީން އުފެދުމާއެކު ދެއްވާފައިވާ މިނިވަންކަމެއްކަމަށެވެ.
"އިސްލާމް ދީނުގެ އަސްލަކާ ހިލާފުނުވާނެގޮތެއްގެ މަތިން ދުލާ ގަލަމުގެ މިނިވަންކަން އޮތީ ދެއްވާފަ. މިކަހަލަ ސަރުކާރަކުން މި ބާވަތުގެ ކަންކަން ހިނގާނެކަން އަޅުގަނޑުމެން އައީ މާކުރިން ދައްކަމުން.،" -ޝާހިދު -
ސަރުކާރަށް ފާޑުލިޔާ ދެ ނޫހެއް ސަރުކާރުން ވަނީ ބްލޮކްކޮށްފައެވެ. އެއީ "ކުރުސީ.ކޮމް" އަދި "ދިޔަވަރު.ކޮމް" އެވެ. މިކަމާގުޅިގެން މީޑިއާ ކައުންސިލް އަދި ނޫސްވެރިންގެ ޖަމިއްޔާ އެމްޖޭއޭ އިން ވެސް ވަނީ ކަންބޮޑުވުން ފާޅުކޮށްފައެވެ.
