ރައީސް އޮފީހުގައި މިރޭ ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް ވިދާޅުވީ، ކޭލަކުނަކީ އިކޯ ޓޫރިޒަމް އަށް ތަރައްގީ ކުރާ ރަށެއްގެ ގޮތުގައި ކަނޑައަޅައި، އެރަށް ތަރައްގީ ކުރުމުގެ މަސައްކަތް ވީހާވެސް އަވަހަކަށް ފެށުމަށް ނިންމާފައިވާ ކަމަށެވެ.
ނާޒިމް ވިދާޅުވީ ކޭލަކުނު ތަރައްގީ ކުރުމުގެ މަސައްކަތުގެ ތެރެއިން، އެ ރަށަށް ޒިޔާރަތްކުރާ ފަރާތްތަކަށް ހާއްސަކޮށްގެން ފްލޯޓިން ރޫމްސް ތަކެއް އެޅޭނެ ގޮތެއް އޮތްތޯ ބަލެމަށް ދިރާސައެއް ކުރުމަށް ނިންމާފައިވާ ކަމަށެވެ.
ކޭލަކުނުގެ ގުދުރަތީ ރީތިކަމާއި މޫދުގެ ދިރުންތަކަށް ގެއްލުން ނުވާނެ ގޮތަށް އެރަށް ތަރައްގީ ކުރެވޭނެ ގޮތެއް ދެނެގަތުމަށްޓަކައި، އެންވާރަމެންޓް މިނިސްޓްރީއާއި ކަމާގުޅޭ އެހެނިހެން ފަރާތްތަކާއި ގުޅިގެން ތަފްސީލީ ދިރާސާއެއް ހެދުމަށް ނިންމާފައި ވާކަމަށް ނާޒިމް ވިދާޅުވި އެވެ.
މީގެއިތުރުން އެރަށަށް ޒިޔާރަރަތްކުރާ ފަރާތްތަކަށް ހާއްސަކޮށްގެން ޒަމާނީ ފެންވަރުގެ ވިޒިޓާ ސެންޓަރެއް ގާއިމް ކުރުމާއި، ރަށުގެ ތާރީހާއި ވަށައިގެންވާ ދިރުންތަކުގެ މައުލޫމާތު ފުރިހަމައަށް ފޯރުކޮށްދެވޭނެ އިންތިޒާމު ހަމަޖެއްސުމަށް ވެސް ނިންމާފައިވާކަމަށް ނާޒިމް ވިދާޅުވި އެވެ.
