ސިޓީން އަމިއްލަ ދަނޑުގައި ކުޅުނު މި މެޗު އަނިޔާއިން ރަނގަޅުވެގެން ގިނަ ދުވަސްތަކެއް ވަންދެއް ކުޅުމާ ދުރުގައި ހުރި ކެވިން ޑި ބްރޭނާ އެނބުރި އައިސް މޮޅުކުޅުމެއްވަނީ ކުޅެފައެވެ.

މި މެޗުގައި ސިޓީން ފުރަތަމަ ހާފު ނިންމާލީ ފިލް ފޯޑެން އާއި ޖޫލިއަން އަލްވަރޭޒްގެ ލަނޑުތަކާ އެކު، ދެ ގޯލުން ކުރީގައި އޮވެގެންނެވެ.

ދެ ވަނަ ހާފުގައި ކުޅެން ނުކުމެ، ފޯޑެން ވަނީ ސިޓީ އަށް އިތުރު ގޯލެއް ޖަހައިދީފަ އެވެ. ސިޓީން މި މެޗުގައި ޖެހި އެއް ގޯލަކީ، ހަޑްސްފީލްޑްގެ ބެން ޖެކްސަން އަތުން ބައިކޮޅަށް ވަން ގޯލެކެވެ. ސިޓީން ޖެހި ފަހު ލަނޑަކީ، ޑި ބްރޭނާ ދިން ބޯޅައަކުން ޖެރެމީ ޑޮކޫ ކާމިޔާބުކުރި ގޯލެކެވެ.