ސީއެންއެމް ޓީވީގެ "އިތުރުކާފު" ޕްރޮގްރާމްގައި ވާހަކަ ދައްކަވަމުން ޖާބިރު ވިދާޅުވީ، ދިވެހިންނަކީ ހުނަރުވެރިބައެއް ކަމަށާއި، ރާއްޖޭގައި ބޭރުމީހުން ކުރާ މަސައްކަތްތަކަށް ދިވެހިން ނިކުންނަންޖެހޭ ކަމަށެވެ. ޖާބިރު ވިދާޅުވީ ވިޔަފާރިތަކަށް ދަތިވާ ވަގުތު އަންނާނެ ކަމަށާއި، ގައުމުތަކަށް ދަތިވާ ވަގުތުވެސް އަންނާނެ ކަމަށެވެ. އަދި މިހާރު ވެސް މިއޮތީ އެ ހާލަތު އައިސްފައިކަމަށާއި، މިހާރުން މިހާރަށް ސަރުކާރުން ވިޔަފާރިވެރިންނާއި އެކު ކޮންފަރެންސެއް ބާއްވަންޖެހޭ ކަމަށް ޖާބިރު ވިދާޅުވި އެވެ.
އަދި ރާއްޖޭގައި ހުރި އިންޑަސްޓްރީތަކުގެ އޮޑިޓެއް ހަދަންޖެހޭ ކަމަށާއި، އަދި އެއޮޑިޓްގެ ތެރެއިން އެކި ދާއިރާތައް މެނޭޖް ކުރާނެ ގޮތް ދެނެގަންނަން ޖެހޭކަމަށެވެ. އަދި ސަރުކާރުގެ އެކި ވުޒާރާތަކުގެ ބެލުމުގެ ދަށުން ވިޔަފާރިތައް އަލުން އާރާސްތު ކުރަންޖެހޭ ކަމަށް ވިދާޅުވި އެވެ.
ޖާބިރު ވިދާޅުވީ މިދަނޑިވަޅުގައި ސަރުކާރުގެ ހުރިހާ ކުންފުނިތަކެއް އުވާލަންޖެހޭ ކަމަށެވެ. އެގޮތުން ސިޔާސީ ބޭނުމަށް އުފައްދާފައި ހުރި "އަންފިޓް" ކުންފުނިތަކެއް އެބަހުރި ކަމަށާއި، އެ ކުންފުނިތައް އުވާލަންޖެހޭ ކަމަށް ވިދާޅުވި އެވެ. އަދި ވިދާޅުވީ ސަރުކާރު ކުންފުނިތައް މަތިބަރުވެފައިވާ ކަމަށެވެ.
މީގެ އިތުރުން ޖާބިރު ވިދާޅުވީ ގެއްލުމުގައި ހިންގުމަކީ ވިޔަފާރި ކުރާ އުސޫލެއް ނޫންކަމަށާއި، ގެއްލުމުގައި ހިންގާ ކުންފުނިތައް މިދަނޑިވަޅުގައި އުވާލަންޖެހޭ ކަމަށެވެ.
