މިދިޔަ ހޯމަ ދުވަހު ޗައިނާ އަށް ފެއްޓެވި ދަތުރުފުޅުގައި މި ދެ ދުވަސް ރައީސް ހޭދަކުރެއްވީ ފުޖިއާން ޕްރޮވިންސްގަ އެވެ. ނަމަވެސް މިވަގުތު ރައީސް ވަޑައިގެން ހުންނެވީ ބެއިޖިން ގައި އެވެ.
އެ ސިޓީން ރައީސް ޑރ. މުއިއްޒަށް ރަސްމީ މަރުހަބާ ދެންނެވީ، ޗައިނާގެ ރައީސް ޝީ ޖިންޕިން އެވެ.
ރައީސްގެ ދެކަނބަލުން ޗައިނާއަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅަކީ ޗައިނާގެ ރައީސް ޝީ ޖިންޕިން ގެ ދައުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި ރައީސްގެ ދެކަނބަލުންގެ އަރިހުގައި ދިވެހި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވަ އެވެ.
ޗައިނާގެ ރައީސް ޝީ ޖިންޕިންއާ އެކު ރައީސް ޑރ. މުހައްމަދު މުއިއްޒު: ދެ ބޭފުޅުން މިއަދު ވަނީ ބައްދަލުކުރައްވާފައި - ފޮޓޯ/ ރައީސް އޮފީސް
މިއީ މިދިޔަ ނޮވެމްބަރު 17ގައި ވެރިކަމުގެ ހުވާ ކުރެއްވުމަށް ފަހުގައި ރައީސް މުއިއްޒު ޗައިނާއަށް ކުރައްވާ ފުރަތަމަ ފުރަމާނަ ދަތުރުފުޅެެވެ. އަދި، މި އަހަރު ބޭރު ގައުމެއްގެ ވެރިއަކު ޗައިނާއަށް ކުރައްވާ ފުރަތަމަ ފުރަމަނާ ފަތުރުފުޅު ވެސް މެއެވެ.
ރައީސް މުއިއްޒު މިއަދު ވަޑައިގަތުމުން 21 ބަޑީގެ ސަލާމެއް ވަނީ އަރުވައިފައެވެ. އަދި، ޗައިނާގެ އަސްކަރީ ބޭންޑުން ދެ ގައުމުގެ ގައުމީ ސަލާމް ވަނީ ކުޅެފައެވެ. އެއަށް ފަހުގައި ރައީސް ޝީ ވަނީ ރައީސް މުއިއްޒަށް ޗައިނާގެ އިއްޒަތްތެރިން ތައާރަފުކޮށް އަރުވައިފައެވެ. އަދި، ރައީސް ޝީއަށް ރާއްޖެއިން ވަޑައިގެންނެވި އިއްޒަތްތެރިން ވަނީ ތައާރަފުކޮށްދެއްވައިފަ އެވެ.
