ވާރޭ ވެހެމުންދާއިރު މޫސުމާ ބެހޭ އިދާރާއިން ބުނެފައި ވަނީ ރާއްޖޭގެ އެކި ހިސާބަށް ވިއްސާރަ ކުރާނެ ކަމަށާއި ބައެއް ރަށްތަކަށް ބޯކާށް ވާރޭ ވެހި ގުގުރާނެ ކަމަށެވެ.
މީގެ އިތުރުން ރާއްޖޭގެ ކަނޑުތައް ގަދަވާނެ ކަމަށް ލަފާކޮށްފައިވެ އެވެ. ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން އެކަށީގެންވާ ކަމަށް ވެސް ބުނެފައި ވެއެވެ.
މާލޭ ސިޓީ ކައުންސިލުން ބުނީ، ރެހެންދި މަގު، ޕަބްލިކް ސާވިސް މީޑިއާ (ޕީއެސްއެމް) ކައިރިއަށް ވެއްޓުނު ގަސް ނެގުމުގެ މަސައްކަތް ފަށާފައިވާ ކަމަށެވެ.
ގަސް ވެއްޓި މަގު ބެދުމުގެ ސަބަބުން އެ މަގު ވެސް ވަނީ ބަންދުކޮށްފަ އެވެ.
މިދިޔަ ހަފުތާގައި ކުރި ވިއްސާރައިގައި މާލޭގެ އިތުރުން އަތޮޅުތެރޭގެ ރަށްތަކަށް ވެސް އެކި ވަރުގެ ގެއްލުންތައް ވަނީ ލިބިފައެވެ. އެގޮތުން މާލެ ސަރަހައްދުގެ 70 ގެއެއްގައި ފެންބޮޑުވި ކަމަށް މީގެ ކުރިން ޑިޒާސްޓާ މެނޭޖްމަންޓު ސެންޓަރުން ވަނީ ބުނެފަ އެވެ.
