ޗައިނާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު ރާއްޖެއަށް އެނބުރި ވަޑައިގެން ވެލާނާ އިންޓަނޭޝަނަލް އެއާޕޯޓްގައި ނޫސްވެރިންނަށް މައުލޫމާތު ދެއްވަމުން ރައީސް ވިދާޅުވީ، އާސަންދަ އަކީ ހަމައެކަނި ވަކި ގައުމަކުން ލިބޭ ހިދުމަތެއްގެ ގޮތުގައި ބޭއްވުމުގެ ބަދަލުގައި، އެއަށްވުރެ ފެންވަރު ރަނގަޅު ގައުމުތަކުން ވެސް އެ ހިދުމަތް ލިބޭނެ ގޮތް ހަމަޖައްސައިދޭން ސަރުކާރުން ނިންމާފައިވާ ކަމަށެވެ.
ރައީސް ވިދާޅުވީ ފެންވަރު ރަނގަޅު ގައުމުތަކުން އާސަންދައިގެ ހިދުމަތްތައް ހަމަޖެހުމާއެކު، ރާއްޖޭގެ ސިއްހީ ވަސީލަތްތައް ތަރައްގީ ވުމާ ހަމަޔަށް ދިވެހިން ބޭސްފަރުވާއަށް ދާނީ ދުބާއީއާއި ބެންކޮކް ފަދަ ތަންތަނުގެ ހޮސްޕިޓަލް ތަކަށް ކަމަށެވެ.
މީގެއިތުރުން ބޭސް ފަރުވާއަށް އެ ގައުމަކަށް ގޮސް ހުރުމުގެ ހަރަދު ވެސް އާސަންދައިގެ ދަށުން ހިމަނައިގެން އެ ހިދުމަތް ފުޅާ ކުރާނެ ކަމަށް ރައީސް ވިދާޅުވިއެވެ.
އާސަންދައިގެ ހިދުމަތް މިވަގުތު ލިބޭ ބޭރު ގައުމުތަކަކީ ހަމައެކަނި އިންޑިއާ އާއި ސްރީލަންކާ އެވެ.