މިއަދު ނޫސްވެރިންނާއި ވާހަކަދައްކަވަމުން އަބްދުރަހީމް ވިދާޅުވެފައިވަނީ ސަރުކާރު ހުއްޓުމަކަށް ގެންނަން އިދިކޮޅު އެމްޑީޕީ އަދި ޑިމޮކްރެޓްސްގެ ފަރާތުން މަސައްކަތް ކުރަމުންދާ ކަމަށެވެ.
އަބްދުއްރަހީމް އިތުރަށް ވިދާޅުވީ އެމްޑީޕީ އަދި ޑިމޮކްރެޓްސްއިން މަސައްކަތްކުރަނީ ސަރުކާރު ޒިންމާދާރު ކުރުމުގެ ބަދަލުގައި އެހެން ވިސްނުމެއްގައި ކަމަށާއި ސިޔާސީ މަގާމުތަކަށް މީހުން އައްޔަނު ކުރުމަކީ ރައީސަށް ގާނޫނުއަސާސީން ލިބިދޭ ބާރެއް ކަމަށެވެ. އަދި ސިޔާސީ މަގާމުތަކަށް އައްޔަނު ކުރާ ބޭފުޅުން ނަތީޖާ ނެރޭނެ ކަމަށް ވެސް ވިދާޅުވި އެވެ.
މަޖިލީހުގެ އަދަދު ލިމިޓު ކުރުމަކީ އިދިކޮޅުގެ ވިސްނުމެއް ނޫން ކަމަށާއި އެއީ ޕީޕީއެމް/ޕީއެންސީގެ ވިސްނުމެއް ކަމަށް ވެސް އޭނާ ވިދާޅުވި އެވެ.
އެ އިސްލާހަށް ސަރުކާރުން ތާއިދުކުރާނެތޯ އަބްދުއްރަހީމް ހާމައެއް ނުކުރައްވަ އެވެ. ވިދާޅުވީ، އެމްޑީޕީއަކަށް ވެރިކަން ކުރަން ނޭނގުނު ކަމަށާއި އެމްޑީޕީއަކަށް ދިވެހި ރައްޔިތުން ބޭނުންވާ ތަރައްގީ ވެސް ނުގެނެވޭ ކަމަށާއި ހަމަޖެހުމެއް ވެސް ނުގެނެވޭތީ ރައްޔިތުން ވަރަށް ތަނަވަސް އަގުލަބިއްޔަތަކުން އެމްޑީޕީގެ ސަރުކާރު ނިންމާފައިވާ ކަމަށެވެ.
