އެ ކޯޓުން މިއަދު ނެރުނު އަމުރުގައިވަނީ ގަތުލްއާންމުގެ އަމަލުތައް ހިނގިޔަ ނުދޭން ފިޔަވަޅުތައް އެޅުމާއެކު އެ އަމުރާ ގުޅޭގޮތުން އިޒްރޭލުން އަމަލުކުރި ގޮތުގެ ރިޕޯޓެއް އެއް މަސް ދުވަހުގެ ތެރޭގައި ހުށަހެޅުމަށް އަންގާފަ އެވެ. އަދި ގާޒާ އަށް އިންސާނީ އެހީ ފޯރުކޮށްދެވޭނެ މަގު ތަނަވަސްކޮށްދިނުމަށް ފިޔަވަޅުތައް އެޅުމަށް އިޒްރޭލަށް އަންގާފައިވީ ނަމަވެސް ހަމަލާތައް ހުއްޓާލަން އައިސީޖޭ އިން އަމުރުކޮށްފައެއް ނުވެ އެވެ.
ދުނިޔޭގެ ކޯޓުގެ މި ހުކުމުން ދޭހަ ކޮށްދެނީ، ގާޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ އުދުވާނާ މުޅި ދުނިޔެ ވެސް ދެކޮޅު ކަމެވެ. ދުނިޔޭގެ ހުރިހާ ކަންކޮޅަކުން ދަނީ ޔަހޫދީންގެ އުދުވާން ކުށްވެރި ކުރަމުންނެވެ. އުދުވާން ހުއްޓައިލަން ގޮވައިލަމުންނެވެ. ނަމަވެސް، މި ގޮވައިލުންތަކަށް ޔަހޫދީން ދެމުން ދަނީ "ބީރު" ކަންފަތެކެވެ.
ދެކުނު އެފްރިކާ އިން ހުށަހެޅި ނަސްލު ނައްތާލުމުގެ ދައުވާގައި އައިސީޖީގެ ނިޔާ ކަނޑައަޅަން އަހަރުތަކެއް ނަގާނެ ކަމަށް ބެލެވެ އެވެ. މިއަދު ނެރުނު އަމުރުގެ މަގްސަދަކީ އެ ކޯޓުން އަސްލު މައްސަލަ ބަލަމުންދާ އިރު ގާޒާގައި ތިބި ފަލަސްތީނު މީހުންނަށް ކޮންމެވެސް ވަރެއްގެ ހިމާޔަތެއް ފޯރުކޮށްދިނުމެވެ.
ފަލަސްތީނުގެ ފޮރިން މިނިސްޓަރު ރިޔާދު އަލް-މާލިކީ އައިސީޖޭގެ އަމުރަށް ވަގުތުން މަރުހަބާ ވިދާޅުވި އެވެ. އޭނާ ވިދާޅުވީ ކޯޓުގެ ފަނޑިޔާރުން ނިންމެވީ އިންސާނިއްޔަތާއި ބައިނަލްއަގުވާމީ ގާނޫނާ އެއްކޮޅަށް ކަމަށެވެ.
ކޯޓުގެ މިފަދަ ނިންމުންތަކާއި ގުޅިގެން ފަލަސްތީނުގެ ފޮރިން މިނިސްޓްރީން ވަނީ މަރުހަބާ ކިޔާފަ އެވެ. އެގޮތުން މިނިސްޓްރީން ނެރުނު ބަޔާނެއްގައި ބުނެފައިވަނީ އެނިންމުމަކީ އެއްވެސް ދައުލަތެއް ގާނޫނަށް ވުރެ މަތީގައި ނެތްކަން ހަނދާންކޮށްދޭ މުހިންމު ނިންމުމެއް ކަމަށެވެ.