ދައުރުން ބޭރުން މިއަދު ބޭއްވި ރައްޔިތުންގެ މަޖިލީހުގެ ޖަލްސާ ގައި ވަޒީރުންނަށް ރުހުން ދިނުމުގެ މައްސަލައި ގައި ވާހަކަދައްކަވަމުން ގާސިމް ވަނީ އެމްޑީޕީ އަދި ދަ ޑިމޮކްރެޓްސްއަށް ވަރަށް ބޮޑަށް ފާޑުވިދާޅުވެފަ އެވެ. ގާސިމް ވިދާޅުވީ އެމްޑީޕީއަށް ވެރިކަން ގެއްލުނީ ރައްޔިތުންގެ އިތުބާރު ގެއްލުމުން ކަމަށެވެ. އެހެންކަމުން ވަޒީރުންނަށް ރުހުން ދޭން ނުޖެހޭ ސަބަބެއް ފެންނަން ނެތް ކަމަށެވެ.
އޭނާ ވަނީ ސަރުކާރުގެ 22 ވަޒީރުންނަށް ވެސް ރުހުންދޭން އެދިވަޑައިގެންފަ އެވެ. އެކަމަކު، އޭނާ ވާހަކަދައްކަވަމުން ދިޔަ ވަގުތު ޑިމޮކްރެޓްސްގެ ޕާލިމަންޓްރީ ގްރޫޕުގެ ލީޑަރު އަލީ އާޒިމް ވާހަކަދައްކަވަން ފެއްޓެވުމުން ގާސިމް ވަނީ ކޯފާ އިސްކުރައްވައިފަ އެވެ.
ގާސިމް އެހެން ވިދާޅުވީ، ބައެއް ވަޒީރުންނަށް ރުހުން ނުދޭން ދަ ޑިމޮކްރެޓްސްގެ ފަރާތުން މިއަދު ތްރީ ލައިން ވިޕެއް ނެރެފައި ވާތީ އެވެ. ގާސިމް ވިދާޅުވީ ވަޒީރުންނަށް ރުހުން ނުދީފިނަމަ ފުރަގަސް އެ ދެވުނީ ރައްޔިތުންގެ ނިންމުމާ ދެކޮޅަށް ކަމަށެވެ. އެއަށް ފަހު އަނެއް ދައުރަށް މަޖިލީހަށް ކުރިމަތި ލައިގެން ރައްޔިތުންގެ ކުރިމައްޗަށް ވޯޓް ހޯދަން ނުދާން ވެސް ގޮވައިލެއްވި އެވެ.
ހިޔާލު ތަފާތުވުންތަކެއް އުފެދި އެކުގައި މަސައްކަތް ނުކުރެވޭ ހިސާބަށް ދިޔުމާ އެކު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ވަކިވި މެމްބަރުން އުފެއްދި ޑިމޮކްރެޓްސް އިން ބުނީ އިދިކޮޅު ޕާލަމެންޓްރީ ގްރޫޕެއްގެ ގޮތުން މަޖިލީހުގައި އެ ޕާޓީން އަމަލުކުރާނީ ފުރިހަމަ ޒިންމާދާރުކަމާއި ތެދުވެރިކަމާ އެކުގައި ކަމަށެވެ.
ބައެއް ވަޒީރުންނަށް ރުހުން ނުދޭން ޑިމޮކްރެޓުން ނިންމި ނަމަވެސް އެއީ ކޮން ވަޒީރުންނެއް ކަމެއް އެ ޕާޓީން ހާމައެއް ނުކުރެ އެވެ. ޑިމޮކްރެޓްސްްއާ އެކު އިދިކޮޅު ޕާޓީއެއްގެ މަސައްކަތް ކުރަމުން އަންނަ އެމްޑީޕީން މިހާތަނަށް އަދި ގޮތެއް ނިންމައިފައެއް ނުވެ އެވެ. އެ ޕާޓީން ގޮތް ނިންމުމަށް މިހާރު ބައްދަލުވުމެއް ކުރިއަށް ދެ އެވެ.